Alkatiri Hakarak Dialog Ho Xanana-Taur

0
959
Xanana, Alkatiri ho Taur konversa malu hafoin enkontru Maubise iha tinan 2010

DILI (TATOLI) –Eis-Prezidente Repúblika, José Ramos Horta informa, Sekretáriu Jerál Fretilín, Mari Alkatiri hakarak halo diálogu ho Prezidente CNRT Kay-Rala Xanana Gusmão ho Prezidente Partidu Libertasaun Popular, Taur Matan Ruak atu servisu hamutuk maski iha koligasaun hosi partidu Demokrátiku ho Kmanek Haburas Unidade Nasionál Timoroan (Khunto).

“Prosesu formasaun governu la’o daudaun hela, foin daudaun mak ha’u sai hosi Otél Novo Turizmu katak lideransa Fretilín, PD no Khunto ko’alia atu hetan akordu ida maibé Fretilín kontinua nafatin atu halo diálogu ho CNRT no PLP atu kolabora malu,” Premiadu Nobel ba Pás, José Ramos Horta ba Jornalista sira hafoin hasoru malu ho Xefe Estadu iha Palásiu Prezidente, Ai tarak Laran, Segunda (04/9).

Nia dehan tan, Frente Revolusionáriu Timor-Leste Independente (Fretilín) sei kontinua halo diálogu ho Partidu Libertasaun Populár no Kongresu Nasionál Rekonstrusaun Timorense (CNRT) atu kolabora malu mezmu iha ona koligasaun hosi partidu Demokrátiku ho Kmanek Haburas Unidade Nasionál Timoroan (Khunto).

Premiandu Novel ba Pás, José Ramos Horta

“Sekretáriu Jerál Fretilín, Mari Alkatiri hakarak halo diálogu ho Kay-Rala Xanana no Lider PLP (Taur Matan Ruak) atu servisu hamutuk maibé la signifika tama hotu koligasaun maibé prinsípiu filozofia polítika Fretilín mak inkluzaun signifika balun tama koligasaun no balun hanesan inkluzaun eh hakarak kolabora malu,” Ramos Horta esplika.

Hodi kompara hanesan uluk iha tinan tolu nia laran, Fretilín la tama koligasaun maibé kolabora makas ho CNRT, prosesu la’o di’ak iha momentu ne’ebá, Fretilín la ezije tantu laiha dokumentu ruma entre Fretilín ho CNRT maibé Xanana presiza bankada Fretilín apoiu orsamentu no Xanana mós fó konfiansa ba Mari Alkatiri kaer projetu boot ZEEMS nian.

“Ne’e ezemplu di’ak ona, mezmu la iha koligasaun ho CNRT maibé sei iha kolaborasaun makas,” subliña tan.

Antes ne’e Sekretáriu Jerál Partidu FRETILIN, Mari Alkatiri esplika akordu ne’ebé partidu tolu (FRETILIN-PD-KHUNTO) asina la’ós automátikamente koligasaun ona maibé ida ne’e hanesan inísiu ida atu forma koligasaun iha loron hirak tuir mai. Biar nune’e, Alkatiri hatudu vontade sei kontinua halo diálogu ho PLP no CNRT

Entretantu aban, Tersa (05/09) Prezidente Repúblika, Francisco Guterres Lú Olo sei halo diskursu iha Parlamentu Nasionál hodi loke sesaun dahuluk IV lejizlatura nian.

(Jornalista : Zezito Silva)

(Editór : Manuel Pinto)

HUSIK IDA HATÁN