Alfándega Rekolla Reseita Millaun U$75

0
132
Diretór Jerál Alfándega, Minstériu Finansa, José António Fátima Abílio. Foto/Egas Cristovão.

DILI, (TATOLI) – Servisu Alfándega, Ministériu Finansa (MF) iha tinan 2016 hatama ona reseita ba Estadu millaun U$75 no konsege alkansa tanjetu ne’ebé MF fó mak montante Millaun U$72, informa Diretór Jerál Alfándega José António Fátima Abílio.

Nune’e iha tinan 2017 progresu serbisu Alfándega nian to’o iha ikus trimestre daruak nian, Alfándega bele rekolla tan reseita pur volta millaun U$36.

“Ita espera katak to’o fin dezembru ami bele alkansa tarjetu ne’ebé fó mai tanba ne’e ita haree de’it. Serbisu Alfádega nian la’o ho di’ak no iha progresu”, José hatete iha edifísiu tuan MF nian, ohin.

José António haktuir serbisu Alfándega nian iha implementasaun sistema Asycuda World iha progresu ne’ebé di’ak no ajuda tebes importadór sira.

Husi prosesu dezalfándegamentu iha mudansa bainhira haree ba time release study iha 2016, 2017 iha redusaun husi tempu loron lima tuun ba loron tolu ka rua.

“Ita buka atu hanehan tuun to’o 24 horas. Husi ne’e ita haree iha progresu signifikante iha prosesu dokumentasaun hasai sasán iha portu”.

Diretór Jerál ne’e relata bainhira Alfándega halo enkontru ho setór privadu, sira apresia ho reforma ne’ebé halo maski neineik maibé hatudu daudaun ona progresu bá oin.

“Agora ita atu tama bá implementa kódigu foun ami tenke halo sosializasaun, uza sitema foun Asycuda World ho infraestrutura kuandu kompletu hotu ona, ita haree katak husi ne’e bele fasilita liután prosesu tantu husi importasaun, pagamentu nian para bele redús tempu demurrage. Kuandu demurrage badak nia simu penalidade lasignifika katak nia lakon, nia bá hasa’e fali iha merkadu no ita sira vítima hotu tan nia hasa’e tiha presu, ne’ebé ita tenta atu halakon demurrage para presu iha merkadu labele sa’e”.

Sobre serbisu Alfándega nian seidauk iha reklamasaun signifikante husi setór privadu sira katak Alfándega atraza sasán maibé iha reklamasaun ki’ikoan maibé Alfándega tenta atu hadi’a.

“Ho implementasaun Asycuda World ho reforma mak Alfándega halo ne’e iha mudansa signifikante ba iha ita-nia importasaun, redús mós tempu demurrage balun. Alfándega laiha hanoin atu impede ema nia sasán sira ne’e”.

Reseita ne’ebé Alfándega rekolla mai husi taxa importasaun (import dutie), excise tax (imposto indereto), sales tax no penalidade.

Import dutie nia hatama mai, nia tenke selu sasán, excise tax ne’e lakona ba hotu, iha item sanulu de’it mak kona hanesan sigaru, tua, kilat ka munisaun, álkool no gás sira, agora tuir lei tributária nia tenke selu sales tax porsentu 2.5, excise nian 2.5 signifika nia tenke selu hotu porsentu lima, depois ho penalidade”.

Jornalista: Maria Auxiliadora

Editora: Rita Almeida

HUSIK IDA HATÁN