AIFAESA Lansa Ona Kampaña Tabaku Ilísitu

0
109
Workshop ne’ebé organiza husi AIFAESA iha Timor Plaza ohin.

DILI, (TATOLI) – Autoridade Inspesaun no Fiskalizasaun ba Atividade Ekonómika (AIFAESA) lansa ona kampaña tabaku ílisitu (ilegál) tuir rejime kontrolu tabaku Dekretu Lei Númeru 14/2016, 8 juñu ne’ebé tama iha vigór iha dezembru 2016.

Koodenadór AIFAESA, Abílio Oliveira Sereno informa kampaña ida ne’e la’ós atu kontra tabaku maibé kontra komersializasaun ilegál ne’ebé latuir regra.

“Kompeténsia ne’ebé (eis) Primeiru Ministru fó ba AIFAESA liuhusi nia despaxu iha loron 20 fulan-juñu fó kompeténsia ba AIFAESA atu mesak de’it halo inspesaun no bele hamutuk ho entidade sira seluk ne’ebé iha kompeténsia para halo kontrolu tabaku. Sadere ba ida ne’e ami fó hatene ba konsumidór sira ba destruídu tabaku ne’ebé sirkula iha Timór katak ne’e hanesan pontu partida para ami lansa kampaña ba munisípiu tomak”, Abílio hatete iha Timor Plaza, ohin.

Iha kampaña ne’e sei fó sai brosura, rezumu iha tetun, portugés no inglés kona-ba dekretu lei aprova rejime kontrolu tabaku para ema hotu haree sobre impaktu husi fuma tabaku.

“AIFAESA rasik konsiente katak kaundu ko’alia kona-ba tabaku ne’e la’ós problema fasil tanba tabaku ne’e iha mundu tomak ne’e lobi maka’as maibé importante ba AIFAESA mak kuandu iha órden no lei para atu halo implementasaun, nia serbisu mak implementa no fiar katak ho sosializasaun ida di’ak, esplikasaun di’ak ba eskola, loja, ministériu no liuliu ba munisípiu sira, ita bele hein katak lalakon maibé redús”.

Ministru Komérsiu, Indústria no Ambiente (MKIA), António da Conceição iha ambítu loke workshop sobre kampaña tabaku ilísitu hatete AIFAESA iha nia serbisu luan ne’ebé akumula atividade mak kontrolu tabaku.

“Hanesan instituisaun ida ne’ebé mak garante kualidade produtu merkadu nian relasionamentu servisu boot tebes mós ho Ministériu Komérsiu no Indústria tanba ne’e mak ha’u-nia prezensa hakarak konfirma  ho responsabilizasaun entre AIFAESA no Ministériu Komérsiu iha atividade ekonómika ninian”.

António hatete ba komérsiu nia espetativa katak povu hein ita-nia prestasaun servisu kualidade, ita-nia povu hein konsumu produtu kualidade.

“Ha’u louva ba serbisu no atusaun ne’ebé AIFAESA dezempeña to’o agora em termos do controlo dos serviços do produtos ne’ebé mak hala’o daudaun iha ita-nia rai ne’ebé ita tenke haree tanba saúde públika importante ba nasaun ne’ebé mak ema barak sei ki’ak ninian”.

Tanba ne’e tenke iha garantia duni atu fó buat ne’ebé kualidade, di’ak ba povu, la’ós tanba nasaun ne’e ki’ak tenke konsome buat ne’ebé mak ladi’ak no ultrapasa prazu tanba dignidade ema nian hanesan mós seluk biar nasaun ne’e ki’ik no ki’ak. Ne’ebé iha direitu tomak atu hetan tratamentu ne’ebé mak dignu pur tantu atividade komersiál hotu tenke fó duni buat ne’ebé kualidade.

Produtu importadu lasignifika garante kualidade ne’ebé mak populasaun atu konsome, produtu importadu garante mak konsekuénsia husi mobilizasaun merkadu tanba ne’e mak nasaun tenke hamriik ho independénsia, soberania atu garante nafatin buat di’ak ba nia povu.

“Ne’ebé ligadu mós ba atividade tabaku ilísitu ne’ebé ita-nia populasaun sei iha faze ida kreximentu ita tenke proteje, atu proteje liuliu jerasaun foun ne’ebé konsome daudaun ona sigaru. Ita iha responsabilidade atu kuída ita-nia populasaun, saúde públika no direitu ne’ebé mak nia tenke atu hetan duni”.

Nune’e Ministru fó apoiu ba atividade ida ne’e no bá oin AIFAESA sei servisu besik ho MKIA atu nune’e serbisu importasaun no esportasaun garante ekonomia ida di’ak iha país ida ne’e.

Rejime foun kona-ba kontrolu tabaku ho objetivu atu evita moras sira ne’ebé maihusi konsumu tabaku no kontrola produtu tabaku nian.

Aleinde ne’e proibisaun sira seluk kona-ba konsumu tabaku iha fatin sira ne’ebé determinadu hanesan fatin públiku fexadu, serbisu-fatin, transporte públiku, agora produtu sira tabaku nian tenke kumpri ho proibisaun no kondisaun foun sira ne’ebé aplikavel.

Iha rejime ne’e hatete sigaru sira ne’ebé prodús no fa’an iha Timor-Leste la bele kontein alkatraun liu miligrama 10, nikotina liu miligrama ida no monóksidu karbonu liu miligrama 10. Sigaru ne’ebé liu limite hirak-nee sei konsidera ilegál.

Aleinde ne’e produtór, importadór distribuidór, retallista no fa’an-na’in sira ne’ebé lakumpri regra sira sei hetan sansaun no selu koima husi U$70-10,000 bazeia ba infrasaun ne’ebé komete.

Iha kampaña tabaku ilísitu ne’e partisipa husi setór privadu sira no oradór husi autoridade kompetente hanesan Ministériu  Saúde, Alfándega , Advogado MIRANDA no AIFAESA.

Jornalista: Maria Auxiliadora

Editora: Rita Almeida

HUSIK IDA HATÁN