AIFAESA Husu PN Aprova Orsamentu ba Laboratóriu

0
49

DILI, (TATOLI) – Koordenadór Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA), Abílio Oliveira Sereno husu ba depatadu sira iha lejislatura dahaat nian iha uma fukun Parlamentu Nasionál (PN) atu aprova orsamentu ne’ebé AIFAESA trasa ona iha planu anuál mak dahuluk laboratóriu.

Abílio esplika orsamentu millaun lima to’o ualu kontempla buat ne’ebé prioridade ba AIFAESA nian mak dahuluk laboratóriu maibé depende hotu ba PN.

“Ami hakarak laboratóriu tanba razaun ami iha ona uma ida iha Tibar atu halo instalasaun laboratóriu. Ami iha tékniku na’in-lima no fiar katak ho na’in-lima ne’e bela halo teste, bele halo análiza. Falta de’it orsamentu, aleinde sosa laboratóriu permite mós ami atu fó formasaun ba ami-nia ema sira ne’e, formasaun kontínua importante tanba nia tenke preparadu para enfreta ema ne’ebé halo kesalahan, tanba ne’e mak ami presiza tebes orsamentu”, Abílo hatete iha Matadouru, ohin.

Aleinde sobre rekursu umanu tanba AIFAESA foin halo rekrutamentu dahuluk maibé laiha fatin atu tau ema no iha setembru agora AIFAESA mós sei halo rekrutamentu ba ema kuaze 35 ka 40.

“Hanesan ne’e mak ami komesa prepara ona para balun bá serbisu iha Tibar para iha ne’e (edifísiu AIFAESA iha Matadouru) fatin iha, ne’e hotu presiza osan para haree manutensaun ba edifísiu ne’e, buat ne’ebé falta para instalasaun iha Tibar tenke funsiona. Haree mós transporte tanba iha Dili tenke iha transporte permanente rua ne’ebé loroloron funsiona no rua ka tolu bá foho para pelu menus fulan ida halo inspesaun bá foho”.

Tuir mapa pesoál AIFAESA nian katak tenke tau ema na’in-lima iha pilotu haat iha munisípiu Kovalima, Bobonaru, Baukau no Oekusi.

“Baukau tanba atividade ekonómika maka’as, Kovalima tanba fronteira ema tama no sai hanesan mós iha Bobonaru, Oekusi pur kauza ZEESM, ne’e mak ita fó prioridade mas sé osan iha, rekursu umanu iha ami tau hotu iha foho sira ne’e”.

Abílio esplika sobre montante orsamentu ne’ebé AIFAESA husu ne’e iha nia justifikasaun no sei aplika tuir planu ne’ebé iha tanba saida de’it mak tau iha planu ne’e tuir buat ne’ebé loroloron AIFAESA enfrenta hela.

“Osan laiha ba rekursu umanu, ekipamentu, transporte, osan laiha laborátóriu, ne’ebé buat sira ne’e ami prontu para defende iha Parlamentu. Ne’e iha ami-nia planu anuál ona, tama ona iha UPMA no haree tiha ona, depois ami mós sei ba defende iha Parlamentu, como instituisaun ne’e tutela hela ba Primeiru-Ministru, ami hanoin katak ho Primeiru-Ministru nia ajuda ita bele konsege porque AIFAESA sé manán populasaun hotu manán tanba AIFAESA mosu atu defende konsumidór sira”.

Jornalista: Maria Auxiliadora

Editora: Rita Almeida

HUSIK IDA HATÁN