Adriano: Servisu Governu Anterior Hanesan Fundasaun Hodi Hatutan

0
96
Ministru iha Prezidensia Konsellu Ministru (MPKM), Adriano do Nascimento. Foto Antonio Goncalves

DILI, (TATOLI) – Ministru iha Prezidensia Konsellu Ministru (MPKM), Adriano do Nascimento rekoñese servisu husi governu anterior iha instituisaun ida hanesan fundasaun hodi hatutan.

“Buat ne’ebé mak halo ona, ha’u rekoñese hanesan fundasaun ida ne’ebé ami mai atu hamrik hodi hametin no hatutan saida mak ita boot sira hala’o”, tenik lideransa foun PKM ne’e iha seremónia entrega programa ba governu foun iha Palásiu Governu, sesta (22/9).

Hodi dehan tan, agora dadauk nia sente servisu ladun todan tanba governante nain haat hala’o ona no falta hatutan de’it, situasaun difisil momentu hahú iha tinan hirak nia laran hodi instala sistema atu halo planu ne’ebé di’ak no hatur programa governu.

“Ha’u fiar katak buat boot ne’ebé imi nain haat halo ona ne’e ha’u bele hamrik iha leten no ema haree ona ha’u, ema bele haree ona rai timor hanesan nasaun ida ukun rasik-án. Maibé iha tempu ita boot sira hamrik ne’e ema ladun haree ita, tanba ita boot sira foin halo fundasaun, nune’e agora nasaun seluk bele haree ita nia jestaun administrasaun nu’udar nasaun nian”, afirma.

Nune’e nia agradese no apresia ba Diretór Jerál, Diretór Nasionál, Xefe departementu no funsionáriu tomak, tanba esforsu no dedikasaun mak fó biban no kbi’it ba governante nain haat hodi hala’o servisu iha ministériu ne’e.

Nia fó hanoin governu foun ne’e la’os atu sobu instituisaun, la’os atu haketak ema husi ida ba seluk maibé hatutan planu ne’ebé iha ona no hadia sistema ne’ebé iha ona atu hadia di’ak liutan no hakbiit liutan rekursu umanu, liu-liu funsionáriu ne’ebé haknar iha ministériu refere.

Iha prosesu elaborasaun hala’o programa polítika iha kompromisu hodi hatur-án iha komponente tolu hanesan hatutan ba programa no atividade governu anterior, kompromotidu atu haree no hatur-án iha planu estratéjiku dezenvolvimentu nasionál ne’ebé halo no aprova ona iha governasaun uluk liuhosi líder istóriku Kay Rala Xanana Gusmão no elabora programa hodi hatur kompromisu ne’ebé partidu FRETILIN no PD.

Nia konsidera PEDN planu ne’ebé di’ak tebes no hanesan referénsia hodi tau iha planu asaun annuál, programa polítika tinan lima no planu annuál kada tinan nomós orsamentu.

Hodi esplika komponente hirak ne’e atu simplifika oinsá mak bele intrepeta no hatur loloos hanoin importante ne’ebé hatur ona iha PEDN nomós hanesan baze atu formula polítika rai ida ne’e.

Jornalista: Julia Chatarina

Editora: Rita Almeida

HUSIK IDA HATÁN