DILI (TATOLI)—Vigáriu Jerál Dioseze Dili, Pe. Jovito do Rego hateten nia la konkorda bainhira halo eleisaun antisipada tanba gasta osan barak no povu ida ne´e kolen tiha ona atu halo eleisaun antisipada, tan ne´e lalika tan provoka situasaun.
“Tanbasá la apoiu de´it governu ida ne´e la´o ba oin, maibé tenki halo eleisaun antisipada? Ha´u hanoin la presiza halo eleisaun antisipada. La´ós tempu ona atu kondena malu beibeik maibé tempu ona atu fó liman ba malu no tulun malu atu hadi´a buat ne´ebé ladi´ak,” Amu Jovito hato´o kestaun ne´e ba jornalista sira iha Palásiu Prezidente Nicolau Lobato, Bairru-Pité, Dili, tersa ne´e, bainhira husu ninia komentáriu kona-ba polémika eleisaun antisipada.
Tuir nia katak tinan sanulu resin lima ukun rasik an, povu no lider nasaun iha ona maturidade ne´ebé ás no maturidade ida ne´e tenke manifesta iha asaun polítika ka hahalok polítika ninian.
“Partidu ida ne´ebé maka manán eleisaun, ne´e hotu-hotu nia partidu maka ida ne´e, maski ita la hili nia. Nia sa´e ba ukun, ukun povu. Tanba ne´e, ha´u hakru’uk,” Vigáriu Jerál Dioseze Dili haklaken.
Pe. Jovito informa katak objetivu polítika maka atu serbí povu, asegura povu nia estabilidade no povu nia moris di´ak. Maibé, lider Igreja Katólika ne´e sente triste bainhira haree timoroan sira laiha boa vontade polítika.
“Hanesan ema ne´ebé boot iha funu laran no hakarak rai ida ne´e nia di´ak, ha´u triste kuandu haree maluk timoroan sira laiha boa vontade polítika. Hakarak apelu ba nai ulun sira, partidu polítiku sira katak sira ne´e rikusoin (asset) nasaun ida ne´e ninian. Asset ida ne´e tenki hatudu ninia osan mean, la´ós hatudu fali besi-ten,” nia esklarese.
“Ita presiza nai ulun sira ne´ebé fuan osan mean atu hakuak situasaun polítika ne´ebé dehan iha krize atu lalika aumenta krize. Ita bele hamate krize ne´e no lalika ba komplika tan situasaun ida ne´ebé komplikada tiha ona. Sé hadomi Timor no hadomi povu, pás no estabilidade, hadomi dezenvolvimentu, ita presiza husik eransa ne´ebé di´ak ba rai ida ne´e. Tempu to´o ona, la´ós ita tuku malu beibeik ho politikise (polítika ulun tún ain sa´e),” Amu Jovito fó hanoin.
(Jornalista: Xisto Freitas)
(Editór : Manuel Pinto)
