DILI, (TATOLI) – Loron dahuluk servisu membru Governu Konstitusionál Dahituk nian, liuliu Ministru ba Prezidénsia Konsellu Ministru (PCM-sigla iha portugés), Adriano do Nascimento hala’o vizita iha kada diresaun ne’ebé hamahan-aan iha ministériu nia okos hodi hetan informasaun, hatene malu ho funsionáriu sira hotu.
Atuál Ministru PCM ne’e hatutan depois ida ne’e, sei hein Ministru sesante, Agio Perreira hafoin mak halo handover ofisiál kona-ba serbisu hirak ne’ebé Governu Konstitusionál da-neen halo.
“Ohin mai só para hasoru malu ho funsionáriu sira depois hetan informasaun sobre papél ida-idak nian”, Adriano hatete ba jornalista sira iha Palásiu Governu, ohin.
Antes vizita ba kada diresaun Ministru PCM hasoru malu uluk ho Sekretáriu Estadu Konsellu Ministru iha Sestu Governu nian, Avelino Maria Coelho da Silva no Diretór Jerál PCM, Victor Maia hafoin hakat ba kada diresaun hodi haree fatin no hasoru malu ho funsionáriu sira hotu.
Iha vizita ne’e Ministru Adriano hetan informasaun husi kada diresaun kona-ba serbisu saida mak hala’o iha fatin sira refere.
Depois vizita hotu iha ámbitu PCM nian, Adriano hatete Governu ida ne’e la’ós atu mai sobu instituisaun ne’ebé iha ona, la’ós mós atu haketak funsionáriu sira ne’ebé serbisu iha fatin ne’e.
“Governu ida ne’e, hanesan Primeiru-Ministru hatete tiha ona ohin dadersán, mai atu indetifika planu, sistema ne’ebé seidauk di’ak nune’e atu hadi’a. Monta sistema oinsá mak atu ezekuta planu hirak ne’e. Governu ida ne’e la’ós atu mai hamenus ida ne’e, ida ne’ebá, sim ita sei haree maibé haree tuir nesesidade polítika husi Sétimu Governu Konstitusionál atu haree sasán sira ne’e hotu”.
Jornalista: Maria Auxiliadora
Editora: Rita Almeida
