Xanana Orgullu ho Konfiansa Governu Ba Komisaun Konsiliasaun

0
2310
Kay Rala Xanana Gusmão hafoin enkontru ho lider partidu FRETILIN iha Hotel Novo Turizmu Lecidere, ohin. Foto Tatoli/Antonio Goncalves

DILI, (TATOLI) – Eis Primeiru Ministru, Kay Rala Xanana Gusmão orgullu ho Governu Koligasaun ne’ebé harii hosi partidu Frente Revolusionariu Timor-Leste Indepéndente (FRETILIN), Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO) hodi fó fiar ba nia kontinua lidera Komisaun Konsiliasaun ba asuntu fronteira marítima entre Timor-Leste no Austrália.

“Ne’e la signifika fó pozisaun oan ida mai ha’u maibé durante ne’e ha’u maka lidera duni asuntu ida ne’e. Ha’u maka sente kontenti ho FRETILIN ho nia aliadu sira (PLP no KHUNTO) ne’ebé depózita konfiansa mai ha’u hodi kontinua lidera komisaun refere”, hatete ba jornalista sira iha Hotel Novo Turismo, Lecidere, sesta lorokraik ne’e, hafoin enkontru ho estrutura partidu FRETILIN.

Nia hatutan asuntu ne’e la’ós foin atu hahú maibé besik atu ramata ona, tan ne’e nia disponível tebes atu lidera Komisaun ne’e.

Iha oportunidade ne’e, Sekretáriu Jerál Partidu FRETILIN, Marí Alkatiri informa asuntu fronteira marítima ne’e kestaun nasionál no la’ós partidu ida nian de’it.

Tanba ne’e,  nia tenik, Governu Koligasaun ne’ebé atu harii kontinua fó fiar ba Xanana Gusmão ho nia ekipa traballu atu lori asuntu ne’e to’o rohan.

Jornalista: Xisto Freitas

Editora: Rita Almeida

HUSIK IDA HATÁN