Xanana Okupadu Ba Asuntu Fronteira Marítima

0
770
Lere Anan Timur

DILI (TATOLI)–Majór Jenerál FALINTIL-Forsa Defeza Timor-Leste (F-FDTL), Lere Anan Timur argumenta katak Eis Primeiru Ministru, Kay-Rala Xanana Gusmão hala’o hela serbisu kona-ba asuntu fronteira marítima entre Timor-Leste no Austrália iha rai liur.

Lere ko’alia kestaun ne’e ba jornalista sira iha Palásiu Prezidenti Nicolau Lobato, Bairu-Pité, Dili, kuarta ne’e, hodi responde ba ema barak ne’ebé kestiona Eis Komandante Gerileiru la mosu iha públiku dezde eleisaun parlamentár liu-ba.

Nia hatutan soberania nasaun ne’e importante, ne’e duni Xanana presiza halo serbisu maka’as hodi solusiona kestaun refere.

“Ita ukun án ne’e dehan totál no kompleta. To’o ohin loron soberania ne’e seidauk kompletu tanba ita seidauk iha espasu iha tasi no aeru. Ita tenki trata ida ne’e. Entaun, karik Xanana iha rai laran laiha, signifika nia iha rai liur hodi trata asuntu ida ne’e,” Lere haktuir.

Nia informa katak nia rasik no timoroan sira sempre fó konfiansa ba Xanana katak uluk nia (Xanana) maka diriji funu to’o Timor ukun án, agora nia kontinua sai aman ba Timor to’o Timor hakmatek.

“Ita labele dehan oras ne’e ita S1 to’o S5 ona, tan ne’e ita maka matenek liu no Xanana lae. Ne’e sala. Dezde iha funu laran, nia (Xanana) aman ba nasaun. Tanba ne’e, ita tenki fiar no konsidera nia nomós labele nega ninia esforsu,” nia tenik hafoin inkontru ho Prezidenti Repúblika, Dr. Francisco Guterres Lú Olo.

Enkontru ho Xefi Estadu Lú Olo, nia haktuir, ko’alia kona-ba situasaun seguransa iha rai laran no nia hatutan katak situasaun iha rai laran dezde kampanha, eleisaun to’o ohin loron hakmatek.

Tuir Majór Jenerál katak iha duni violénsia ida iha Tequinomata, Laga, Baucau, loron hirak liu-ba, ne’ebé hamate ema ida no kanek maibé ne’e problema ki’k.

“Problema ne’e entre oknum arte marsiais balun maibé polísia kaptura ona autór sira hodi detein iha sela Polísia Munisípiu Baucau,” veteranu ne’e haklaken.

Lere salienta Forsa Defeza kontinua kolabora ho Polísia hodi asegura eventu sira hanesan tomada pose ba membru Parlamentu Nasionál foun no formasaun governu foun iha agustu nia laran.

(Jornalista: Xisto Freitas)

(Editór : Manuel Pinto)

HUSIK IDA HATÁN