Xanana Demite Nu’udar Prezidente Partidu CNRT

0
3172
Maun Boot Kay Rala Xanana Gusmão.

DILI (TATOLI)—Prezidente Partidu Kongresu Nasionál Rekonstruksaun Timor-Leste (CNRT) Kay Rala Xanana Gusmão sente katak durante tinan sanulu la iha tempu hodi orienta didi’ak partidu CNRT, ohin, Sesta (04/08) afirma hodi demite hosi kargu nu’udar Prezidente Partidu CNRT maibé sei kontribui nafatin ba CNRT.

“Rajaun durante tinan 10 ha’u ladun orienta di’ak liu partidu karik? Formasaun no kurizi hahalok membru governu, nune’e ha’u Kay Rala Xanana Gusmão dimite an hosi kargu Prezidente partidu CNRT maibé servi nafatin ba CNRT ba tinan lima mai hodi ajuda hakbit CNRT ne’ebé ha’u respeita tebes. Husu ba estruktura atu konvoka kongresu extraordinariu ida atu koalia fali kona ba lideransa partidu nian ba future,” Xanana afirma iha sentru konvensaun Dili.

Nu’udar Maun Boot ba partidu Xanana konsidera derota ne’ebé CNRT hasoru iha eleisaun lejislativa foin lalais ne’e nu’udar oportunidade atu hadia, aprende, atu kurizi no reforsa liu tan CNRT ba oin.

Xanana mós bolu atensaun ba kuadrus polítiku, simpatizante no militante atu iha Konfrensia nasionál durante loron tolu (Sesta-Domingu) ida-idak haree ba nia isin lolon rasik, tanba dala ruma la deskobre moras iha isin lolon mak ikus mai sei mate.

“Iha kongresu ita dehan ona CNRT sei hetan maioria absoluta atu ka’er ukun mesak, rezultadu mak mosu ona hodi dehan ita nia hanoin no hakarak  los ka,” Xanana relembra hikas.

Hodi tau esperansa ba CNRT katak, iha future mai CNRT boot la’ós tanba ema barak, maibé boot tanba nia hanoin la’o ho di’ak hodi haree ba nasaun nia futuru.

Vizaun no hanoin ida ne’e mak presiza iha tinan lima mai CNRT hamutuk ho Xanana prepara hodi nune’e partidu sei kontinua buras, la’ós mate bainhira Xanana sai hosi Prezidente.

“Se mate ita prepara halo saida ?,” Xanana kestiona no espresa sentimentu triste kahor ho orgullu hodi afirma bazeia ba etika polítika Xanana tenki hola dezisaun hodi demite hosi kargu basa rezultadu eleisaun hatudu la atinji espektativa antes eleisaun tan ne’e nu’udar lider politika ba CNRT iha dever moral atu assume responsabilidade kona-ba derota eleitorál hodi rekunese nia lideransa mak sala.

Komparasaun Votantes CNRT nian 2012 ho 2017

Munisipiu Aileu iha 2012 votante hamutuk 10,785 no 2017, 10, 239, signifika municipiu Aileu iha tinan 2017 menus votante 546 hosi rezultadu 2012 nian.

Ainaro, 2012, votante iha 9.239 iha tinan 2017 sa’e ba 9.285, signifika aumenta 47 votante iha 2017.

Baukau, 2012, votante 12.458, iha 2017 tun ba 6.208, signifika CNRT lakon votus iha tinan ida ne’e hamutuk 6250.

Bobonaro, 2012, votante hamutuk 15.285 entertantu 2017, sa’e ba 15.288 signifika aumenta ema nain 3 iha tinan ida ne’e.

Covalima, 2012 iha votante 8.644 no 2017 sa’e ba 9.172, signifika aumenta 528 votu iha tinan ida ne’e.

Dili, 2012 iha votante 45.456 maibé iha 2017 votante sa’e ba 45.701, signifika aumenta votu 245.

Ermera, 2012 iha votu 19.354 no 2017, sa’e 19.577, sa’e 532 votu.

Lautem, tinan 2012, votu iha 5.799, agora 2017 sa’e ba 7.673, signifika aumenta 2.074.

Likisa, tinan 2012, votu iha 11.996, iha 2017 tun ba 10.987, signifika lakon 1009 votu.

Manatuto, 2012 CNRT hetan votu 9.242 no 2017 tun ba 7.761 lakon 1481 votus.

Manufahi, 2012 iha votu 7.006 ba 2017 sa’e ba 7.637 signifika aumenta 631 votu.

Oekusse, iha 2012 CNRT hetan votu 12.087, maibé 2017 tun ba 10.490 signifika lakon votu 1.597.

Vikeke, iha 2012 CNRT hetan votu 5.567 no 2017 sa’e ba 6.609, signifika aumenta 1.042 votu.

Aústralia iha 2017 hetan 86, Corea do Súl 52, Portugal 48 no Reino Unido 32.

Entertantu totál votus ne’ebé CNRT hetan iha tinan 2012 hamutuk 172.908 votu no iha tinan 2017 tun ba 167,345 votus ho nune’e iha eleisaun lejislativa tinan ida ne’e CNRT lakon votu hamutuk 5.563 votu.

(Manuel Pinto)

 

HUSIK IDA HATÁN