Vise-ministra Edukasaun Rekomenda Buat Rua ba VII Governu

0
241
Vise-Ministra Edukasaun, Dulce de Jesus Soares bainhira partisipa iha talk show Ita-Nia Governu. Foto/António Gonçalves.

DILI (TATOLI)-Hein pose ba membru governu, Dulce de Jesus Soares, membru governu VI konstitusionál ne’ebé asume pasta vise-ministra edukasaun asuntu pré-eskola no ensinu báziku rekomenda hela buat importante rua ba governasaun tuir mai.

Rekomendasaun sira ne’e mak sistemátiku– jestaun rekursu umanu edukasaun no jestaun eskolár ho sistemátiku – jestaun administrativu ministériu nian, haktuir Dulce de Jesus iha nia pájina ofisiál, ajénsia Tatoli, ohin.

I.Sistemátiku–jestaun rekursu umanu edukasaun no jestaun eskolár mak:

  1. Aprova kuadru pesoál (liuhusi Diploma Ministeriál konjuntu Ministériu Finansas, no bazeia ba regra sira-ne’ebé identifika ona), no hahú implementa iha 2018. Uza ida-ne’e nu’udar baze atu:
  • Koloka manorin sira ho loloos atu hamenus númeru alunu iha sala-de-aula laran;
  • Halo rekrutamentu foun (no tempu hanesan bele rezolve asuntu profesór kontratadu sira-nian)
  1. Liga Regulamentu Dixiplinár ho Avaliasaun Dezempeñu, no muda maneira avaliasaun dezempeñu atu inklui métodu kualitativu, hanesan observazaun sala-de-aula no asegura ninia rigor
  2. Haree fali Lei Regime Carreira Docente atu asegura ninia sustentabilidade, no asegura katak halo planu adekuadu orsamentu kona-ba nesesidade pesoál dosente atu hala’o tuir lei tinan-tinan (inklui promosaun dosente)
  3. Hala’o avaliasaun dezempeñu bazeia ba métodu avaliasaun kualitativa jestaun eskolár ba diretór no adjuntu eskola sira hotu, no halo rekrutamentu ida-ne’ebé bazeia ba méritu
  4. Foti medida atu harii sala-de-aula sira-ne’ebé presiza lalais, ho maneira ne’ebé efetivu liu finansialmente liu (cost effective) (Informasaun kona-ba ida-ne’e inklui iha aneksu)
  5. Aprova regulamentu ba área edukasaun ne’ebé sujeitu desentralizasaun no serbisu hamutuk ho MAE atu garante pesoál munisipál sira sei hetan apoiu másimu, no mós asegura sira-nia asesu ba internet no buat sira seluk ne’ebé presiza;
  6. Fó valór ba funsionáriu eskola no manorin sira bainhira merese, no fó konsekuénsia ho konsistente no justu bainhira halo sala. Respeita manorin sira-nia serbisu, ne’ebé la’ós fasil;
  7. Halo estratéjia atu hasa’e autonomia administrativu husi eskola sira liuhusi elabora no aprova regulamentu (no instrumentu implementasaun) atu suporta no monitora sira-nia jestaun eskolár;
  8. Halo programa pilotu atu hasa’e autonomia finanseira husi eskola balu atubele hahú hametin kapasidade finanseira eskola nian ho graduál;
  9. Regula apoiu orsamentu/subsídiu públiku ba eskola privada (parseria ho privadu) no promove sistema ida-ne’ebé la hatodan Ministériu nia jestaun (e.z. eskola mak selu sira-nia profesór rasik) no ne’ebé sei hametin asesu inkluzivu ba eskola sira privada ne’ebé sai parte ba rede públika.

Programátiku (iha área Pre-eskolár – Ensinu Báziku – Ensinu Rekorrente de’it)

  1. Imprime livru sira-ne’ebé seidauk imprime no fahe ba eskola sira atubele hanorin 5º – 6º anu ho loloos;
  2. Kontinua fó esforsu másimu ba kualidade prosesu ensinu-aprendizajen, liuhosi fó formasaun, monitorizasaun, no mentorizasaun ba manorin sira, inklui kontinua formasaun atu hametin kapasidade atu implementa orientasaun progresaun lian iha ensinu báziku;
  3. Uza rezultadu hosi mini-EGRA atu estabelese intervensaun balu ne’ebé Ministériu sei hala’o atu hadi’a alunu sira-nia dezempeñu molok 2020;
  4. Halo EGRA no EGMA iha 2020 atu sukat ho loloos kurríkulu foun nia efetividade, no halo análise kona-ba mudansa saida presiza atu hadi’a kualidade edukasaun iha nivel Ensinu Báziku
  5. Realiza formasaun ba profesór sira-ne’ebé hanorin klase multi-seriál iha ensinu báziku sira iha área remota, no ba sira ne’ebé iha alunu barak ne’ebé la domina lian Tetun molok tama eskola;
  6. Kontinua haburas área pre-eskolár, hodi asegura asesu no kualidade edukasaun pre-eskolár ba labarik barak liután;
  7. Buka maneira kriativu no kustu-efetivu atu uza videu no IT atu apoia formasaun no manorin sira-nia abilidade hanorin, no mós atu ajuda ho aprendizajen distánsia nian ba formasaun manorin sira-nian, no mós ba Ensinu Rekorrente;
  8. Hala’o pilotajen Edukasaun Multilinge Bazeia ba Lian Inan (EMBLI) iha eskola 10 ba tinan rua tan, no halo avaliasaun ba alunu sira-nia domíniu ba konteúdu kurrikulár hotu, inklui lian ofisiál rua, iha siklu daruak nia rohan, atubele halo desizaun loloos kona-ba efetividade programa ida-ne’e nian

Seluk, kona-ba sistemátiku – jestaun administrativu ministériu nian mak hanesan:

  1. Estabelese sistema internál ne’ebé la’ós burokratizadu atu implementa atividade no programa sira no hala’o prosesu pagamentu sira hotu, atu pagamentu la tarde demais;
  2. Halo selesaun ba pozisaun diresaun no xefia sira hotu bazeia ba méritu liuhusi konkursu públiku nian;
  3. Asegura planeamentu ho kualidade ba edukasaun (análise espesializadu kona-ba rekursu umanu, orsamentu, no infraestrutura edukasaun, no garante planu sai nu’udar instrumentu serbisu loroloron nian (la’ós formalidade de’it);
  4. Monitoriza implementasaun orsamentu programátiku ho rigór (husi orsamentu hira mak ezekuta porsentajen hira mak benefisia eskola/alunu loloos? No hira mak ME gasta ba ninia funsionamentu ka ba ninia funsionáriu);
  5. Hametin sistema aprovizionamentu iha ME no garante aprova prosedimentu internál atu ezije peskiza merkadu molok determina folin husi aprovizionamentu atu garante jestaun efisiente rekursu finanseiru no hatún posibilidade mal administrasaun no korrupsaun, inklui determina análise prévia husi Gabinete Jurídico ba tipu konkursu nian (no garante GJ iha rekursu umanu natoon).”

Entretantu, rekomendasaun ne’ebé vise-ministra edukasaun VI konstitusionál ne’e bele asesu mós liuhusi link ME nian hanesan www.moe.gov.tl.

(Jornalista: Rafy Belo)

(Editór : Manuel Pinto)

 

 

 

HUSIK IDA HATÁN