VI Governu Sei Entrega Dokumentu Retratu Ba Governu Foun

0
84
Primeiru Ministru simu rekordasaun hosi Komisaun Funsaun Publika hafoin enkontru ho dirijente administrasaun públika ne’ebé organiza hosi KFP iha Ministériu Finansa, Aitarak laran, ohin. Foto Tatoli/Antonio Goncalves

DILI, (TATOLI) – Primeiru Ministru, Rui Maria de Araújo informa VI Governu Konsitusionál sei entrega dokumentu retratu ba governasaun foun ba periódu 2017 to’o 2022.

“Iha loron 4 agustu, ita halo lansamentu ba prosesu governasaun da-neen, hanesan dokumentu ne’ebé atu entrega ba governu foun ne’ebé mai inklui dokumentu retratu hosi VI governu konstitusionál hodi aprezenta, liuliu dadus hotu atu hatudu katak saida mak ita halo durante tinan rua ho balun”, Xefe Governu iha nia intervensaun, ámbitu enkontru ho dirijente administrasaun públika ne’ebé organiza hosi Komisaun Funsaun Públika (KFP) iha Ministériu Finansa, Aitarak laran, ohin.

Nia hatutan, durante ne’e loke fila fali prosesu tarefa VI Governu Konstitusionál nian ne’ebé hatudu buat barak mak halo ona no husu ba governu foun atu presta servisu ho laran, nune’e bele kontribui di’ak liu tan iha prosesu administrasaun públiku nian.

Nia husu ba funsionáriu administrasaun públika atu servisu ho objetividade, profesionalizmu iha prosesu tranzisaun tanba destinu Estadu tenke aposta buat di’ak no kuandu la di’ak labele halo.

Enkuantu, polítika partidaria tenke tau ba kotuk mezmu ema ne’e la pretense iha partidu ne’e maibé nu’udar funsionáriu públiku tenke iha responsabilidade no obrigasaun atu hadi’a buat ne’ebé la di’ak.

“Polítika partidaria tenke tau ba kotuk tanba durante tina rua ho balun akontese loloos no ita la permite atu akontese, la loos kuandu funsionáriu públiku halo polítika ho informasaun iha instituisaun nia laran atu hetan nia tarjetu”, nia afirma.

Hatutan tan, kuandu dirijente administrasaun públika la ultrapasa tentasaun, keta hakfodak ba prosesu dezenvolvimentu tanba mudansa sei la’o tuir ritmu dezenvolvimentu.

Entretantu, administrasaun públika mak savi ba implementasaun programa liuhosi fatór determinante lideransa tanba ne’e presiza hatene polítika institusionál, tenke hatene halo jestaun finanseiru no tenke sai profesór di’ak iha instituisaun.

Jornalista: Zezito Silva

Editora: Rita Almeida

HUSIK IDA HATÁN