Ukun Teknokrátiku Solusaun ba Koligasaun-Aliansa

0
300
Diretór Asosiasaun HAK, Manuel Monteiro

DILI (TATOLI)—Diretór Asosiasaun HAK, Manuel Monteiro konsidera promove governasaun teknokrátika nu’udar solusaun polítika hanesan koligasaun ka aliansa tanba ne’e sujere ba FRETILIN (Frente Revolução de Timor-Leste Independente) nu’udar partidu vensedór tenke halo avaliasaun ba ukun tinan 15 liubá ne’e.

“Kona-ba saida mak seidauk di’ak. Depois eskolla ema ne’ebé mak atu ba sai ministru, vise-ministru no sekretáriu estadu tuir abilidade ne’ebé mak iha,” hateten Diretór Asosiasaun HAK, Manuel Monteiro ba ajénsia Tatoli iha nia kna’ar fatin, Farol, Díli, ohin.

Nune’e mós, ema ne’ebé eskolla hodi asume kargu tenke iha patriotizmu, nasionalizmu tan bainhira maske ema iha méritu doutór, profesór doutór no seluk tan la iha espiritu rua ne’e sei hanoin de’it mak na’uk. Tanba ne’e, importante mak tenke halo avaliasaun ida di’ak duni.

Manuel sujere tan ba FRETILIN ne’ebé mak iha posibilidade atu governa rai Timor ba tinan lima mai oin tenke halo reflesaun ida ne’e di’ak no analíze no haree kontratu polítika ida di’ak ba partidu sira ne’ebé tama, haktuir ba esperiénsia ne’ebé FRETILIN iha, iha tempu AMP (Aliança Maioria Parlamentar).

FRETILIN tenke halo reflesaun ida ne’e di’ak. Bolu ema teknokrata mós tenke haree ba ema nia dedikasaun, iha duni moral di’ak atu ba kaer ukun. “Atu ba kaer ukun tenke iha morál,” diretór ne’e reforsa.

Kuandu morál la di’ak sei la promove  prinsipiu boa governasaun iha formasaun governu ne’ebé mak atu mai.

Nia hateten, ukun na’in sira tenke iha morál, hanesan espellu mai ita. Sira mak sai espellu mai ita, sira mak sei leno aan mai ita. Sira mak morál monu, la iha dignidade, la iha espiritu patriotizmu, nasionalizmu, jerasaun tuir mai sei aat liutan.

Edukasaun sívika tenke la’o nafatin ba teritóriu hotu atu forma ema nia espiritu nasionalizmu, ema nia espirítu patriotizmu hodi hadomi rai ida ne’e. nune’e labele hadomi nasaun seluk liu fali Timor-Leste ne’ebé eroi barak lori sira-nia isin, sira-nia raan terus ba rai ida ne’e.

Aleinde ida ne’e Partidu tenki promove formasaun polítika ba kuadrus, nune’e hatene sentidu estadu no intreses povu nian atu ukun karik keta monu ba malisan habokur aan, hariiku aan, hariku sira-nia grupu.

“Atu promove espíritu patriotizmu no nasionalizmu, partidu polítiku sira tenke halo edukasaun sívika no formasaun kontinua ba nia kuadru no militante eh simpatizante sira. La’ós de’it iha tempu atu tama ba kampaña, partidu tenke funsiona. Ne’e mak ita dehan rekrutamentu polítiku,” Manuel Monteiro esplika.

Hodi reforsa intensaun promove governasaun teknokrátika, patriotizmu no nasionalizmu importante tanba husi espiritu rua ne’e ema bele serbisu ho di’ak no sei hadomi nia serbisu rasik.

“Ema fó fiar ba ita tanba iha dedikasaun, maturidade polítika ne’ebé mak di’ak tanba ne’e make ma fó fiar mai ita,” nia konklui.

(Jornalista: Rafy Belo)

(Editór : Manuel Pinto)

HUSIK IDA HATÁN