Tribunál Rekursu Legaliza Rezultadu Eleisaun Parlamentár

0
473
Seremónia proklamasaun rezultadu eleisaun parlamentár iha Tribunál Rekursu, Caicoli, Dili, ohin. Imajen Ajénsia TATOLI/Xisto Freitas.

DILI, (TATOLI) – Tribunál Rekursu (TR) ofisialmente legaliza rezultadu eleisaun parlamentár iha edifísiu TR, Kaikoli, tersa (1/8) katak, laiha irregularidade, hafoin durante oras 72 nia laran halo verifikasaun ba rezultradu provizóriu ne’ebé aprezenta hosi Komisaun Nasionál Eleisaun (CNE) iha sábadu (29/7).

Prosesu verifikasaun ba rezultadu provizóriu eleisaun parlamentár ne’ebé hala’o hosi juiz koletivu Deolindo dos Santos, Guilhermino da Silva no Maria Natércia Gusmão, la hetan irregularidade ruma.

Aleinde ne’e, durante oras 48 nia laran (hahú hosi sábadu (29/7) tuku 19:00 to’o segunda (31/7)), TR fó oportunidade ba partidu polítiku sira atu hato’o reklamasaun ka rekursu ruma ba rezultadu eleisaun refere maibé en-felizmente laiha.

Tanba ne’e, Lei Eleisaun Parlamentár artigu 50 fó dalan ba juiz koletivu hodi legaliza no proklama rezultadu eleisaun parlamentár iha loron ohin.

Rezultadu eleisaun ne’ebé proklama direta hosi Prezidenti TR, juiz Deolindo dos Santos hatudu katak partidu Bloku Unidade Popular (BUP) hetan votu 4.999 (0,9%), APMT hetan votu 5.461 (1,0%, KHUNTO 36.547 (6,4%), PEP 6,775 (1,19%), PST 4.891 (0,9%), PDP 2.079 (0,4%), CNRT 167.345 (29,5%), PR 3.951 (0,7%), UDT 11.255 (2,0%), PDC 1.764 (0,3%), MLPM 1.332 (0,2%), PLP 60.098 (10,6%), PD 55.608 (9,8%), UNDERTIM 1.216 (0,2%), PUDD 15.887 (2,8%), PTD 669 (0,1%), Frenti-Mudança 8.849 (1,6%), PSD 4.688 (0,8%), CASDT 2.330 (0,4%), PDN 3.846 (0,7%) no FRETILIN 168.480 (29,7%).

Hosi rezultadu ne’e, partidu lima maka hakat liu barreira pursentu haat maka hanesan FRETILIN hetan kadeira 23 iha Parlamentu Nasionál, CNRT kadeira 22, PLP kadeira ualu, PD kadeira hitu no KHUNTO kadeira 5.

Iha parte seluk, totál eleitór inskritu ba eleisaun parlamentár hamutuk 760.907, eleitór votante 583.956, votu válidu expressos 568.070 (97,28%), votu branku 4.097 (0,70%) no votu nulu 11.711 (2,01%).

Iha biban ne’e, Vise Sekretáriu Komisaun Diretiva Nasionál partidu CNRT, Francisco dos Santos deklara respeita desizaun Tribunál Rekursu ba rezultadu eleisaun parlamentár no konsidera informasaun ne’ebé antes ne’e dehan CNRT sei halo rekursu ba rezultadu eleisaun ne’e boatus de’it.

Proklamasaun ba rezultadu eleisaun parlamentár hala’o iha tuku 14:15 no partisipa hosi reprezentante partidu polítiku sira hamutuk 21 ne’ebé konkore ba eleisaun parklamentár, reprezentante CNE, STAE, observadór nasionál no internasionál.

Jornalista: Xisto Freitas

Editora: Rita Almeida

HUSIK IDA HATÁN