Tribunál Konta Seidauk Vistu Planu Jerál Drenazen

0
166
Vise I Ministériu Obras Públika, Transporte no Komunikasaun (MOPTK), Januário Pereira.

DILI, (TATOLI) – Vise I Ministériu Obras Públika, Transporte no Komunikasaun (MOPTK), Januário Pereira hateten planu jerál drenazen iha sidade Dili sei pendente tanba dokumentu sei iha Tribunál Konta no hein hela vistu.

“Iha tinan 2015 governu halo impréstimu ida ba banku Xina, ninian dokumentu sira haruka hotu ona ba Tribunál Konta no hein hela vistu previu atu oinsá la’o ba oin maibé to’o agora seidauk”, informa nia ba ajénsia Tatoli iha kna’ar fatin, horseik.

Nia dehan: “Hein katak presesu hirak ne’e iha tempu badak bele iha rezultadu di’ak”.

Governante ne’e haktuir, antes ne’e hafoin governu servisu ho Águas de Portugal (ADP) hodi halo levantamentu ida kompletu konaba sidade Dili para halo fazeadamente drenazen iha kapitál, nune’e ba futuru labele provoka bee foer iha tempu udan.

Hodi informa diresaun ne’ebé toma konta água no saneamentu sei alista no dezamina impaktu konaba planu jerál drenazen.

“Agora kontinua la’o hela, karik mak orsida ninia implementasaun ita tenke haree impaktu ba aban bain rua sei karik eskuamentu foun, liu-liu bee sira mai husi foho lolon kona ema nia uma balun karik tenke rezolve tanba ne’e interesse ema barak nia, interesse komum, interesse sidade ne’e ninian”, afirma.

Nia dehan tan, agora tékniku sira la’o hela iha terenu no sira sei informa autoridade sira para bele tau orsamentu hafoin bele liberta fatin sira ne’ebé afetadu.

Haktuir iha programa governu ne’ebé ajénsia Tatoli asesu husi portál governu, planu atu hadi’a drenazen iha sidade Dili tamba Rai Timor-Leste iha foho barak no klima mosaun (movimentu ou deslokamentu) ne’ebé hamosu bee-sa’e no rai-monu iha área rurál no urbanu. Problema hirak ne’e mak sai nu’udar kauza prinsipál kona-ba kolapsu no destruisaun estrada sira.

Nune’e Governu sei realiza servisu enjeñaria ne’ebé nesesáriu atu hakbiit komunidade lokál sira hodi bele buka solusaun lokál ba problema hirak kona-ba drenazen.

Parte fundamentál ida hosi solusaun hirak ne’e maka manutensaun ba drenazen atuál.

Jornalista: Julia Chatarina

Editora: Rita Almeida

HUSIK IDA HATÁN