Triángulu Hahú Implementa Planu Asaun

0
117
Xefe Unidade Misaun no Reprezentante Estadu, João Goncalves.

DILI, (TATOLI) – Planu dezenvolvimentu ekonómiku sub-rejionál integradu entre Timor-Leste, Indonézia no Austrália (TIA-Growth Triangle) hahú ona implementa setór tolu hanesan turizmu liga ho konetividade, agrikultura no peska.

Xefe Unidade Misaun no Reprezentante Estadu, João Goncalves hatete planu asaun ne’e aprova ona no hetan ratifikasaun husi kada Governu ne’ebé asina liuhusi Ministru Negósiu Estranjeiru.

Iha planu dezenvolvimentu ne’ebé mak aprova, deside hili setór hitu no daudaun hahú ona setór tolu mak turizmu ligasaun ho konetividade, agrikultura no peska.

“Iha agrikulra no peska ne’e, instituisaun ida husi Austrália mak hala’o programa asaun tékniku iha área haki’ak karau ninian, iha sub-tejionál seluk mós halo programa kooperasaun iha área ida ne’e”, João esplika iha Fatuhada, ohin.

Iha área turizmu ninian iha ona vizita estudu ida hanesan sira ne’ebé mak servisu tula turista sira halo ona vizita bá Papua Nova Giné, tanba Timor-Leste mós buka oportunidade atu lori turista husi rai-liur mai.

“Konforme relatóriu horisehik ami simu, sira aprende buat barak no sira buka atu adota iha ne’e”.

Antes ne’e iha enkontru ne’ebé hala’o iha Austrália mós ko’alia kona-ba gastronomia, tanba turizmu iha komponente barak hanesan mos turizmu tasi nian, turizmu foho nian, turizmu kukturál no istóriku.

“Ita mós agora buka dalan atu diversifika ita-nia ekonomia hodi halakon dependénsia ba fundu minarai no gas. Presu mina no gás tun nune’e ita presiza haree ona dezenvolve setór alternativu”, hatete.

Ho ida ne’e Timor-Leste presiza buka ona dezenvolve planu ida ne’ebé di’ak atu dezenvolve artíkula sustentável iha rai-laran.

Jornalista: Maria Auxiliadora

Editora: Rita Almeida

HUSIK IDA HATÁN