TL Sei Sai Modelu Rede Parlamentu Juvenil CPLP

0
93
Bandera membru CPLP

DILI, (TATOLI) – Timor-Leste (TL) sei sai modelu rede parlamentu juvenil Komunidade Dalen Portugés (CPLP-sigla portugés) tanba Estadu membru CPLP hakarak aprende atu estabelese sira nia rede parlamentu juvenil iha sira nia rai.

“Ha’u ba ko’alia konferénsia ministru CPLP atu estabelese rede parlamentu juvenil CPLP nian, sira hakarak aprende oinsá lori Timor-Leste sai modelu atu estabelese sira nia rede parlamentu juvenil”, hateten Sekretáriu Estadu Juventude no Desportu (SEJD), Leovigildo Hornay iha semináriu loron internasionál juventude iha Delta Nova, ohin.

Meius ne’e nu’udar rede komunikasaun entre juventude husi CPLP hodi kria amizade, fraternidade, hametin relasaun emosionál entre joven sira, nune’e kapasita-án ho kualidade intelektuál no morál ne’ebé a’as, bele sai poténsia lideransa futuru ne’ebé di’ak no loos ba nia án, família, nasaun no mundu.

“Ha’u foin fila ho delegasaun boot iha simeira konferénsia juventude CPLP nian iha Portugal, ami halo relatóriu hosi Estadu membru ida-idak, hahú kedas hosi ita nia lider boot sira to’o ita, agora ita atu konsege reforsa Timor-Leste sai modelu”, haktuir nia.

Tuir nia, metade komponente iha mundu komesa konta ona komunidade nasaun lian portugés, tanba TL introduz tan rede parlamentár juventude CPLP ho fasíl atu foin sa’e bele tama hodi ko’alia liu tan iha kontinente hotu, tantu iha Áfrika, Amerika Latina hosi Brasil, pasífika nian iha Ázea bele liuhosi TL, hosi Eropa nian bele liuhosi Portugal.

“Ita presiza prepara jerasaun ne’ebé ho nivél a’as liu atu ba halo promosaun maibé importante tenke investe iha rekursu úmanu ne’ebé di’ak liu tan no atu aprofunda no buka mellora kapasidade”, afirma nia.

Kuandu rede parlamentu juvenil mosu la’os ba de’it alumni parlamentu sira de’it maibé loke ba ema hotu atu bele kandidata án no bele priénse rekezitu.

VI Governu Konstitusional ne’ebé mai presiza kontinua programa sira ne’ebé mak iha tanba governu ida ne’e halo ona rekomendasaun ba governu foun mai, nune’e bele kontinua programa sira.

Jornalista: Zezito Silva

Editora: Rita Almeida

HUSIK IDA HATÁN