Tinan Oin Postu Ida Estabelese Kooperativa Ida

0
34
Foto/Google.

DILI (TATOLI)—Haktuir ona iha planu Ministériu Komérsiu, Indústria no Ambiente (MKIA), liuhusi Diresaun Nasionál Kooperativa Mikro no Pequena Empreza nian iha tinan 2018 katak sei harii kooperativa ida de’it iha postu ida.

Diretór Nasionál Kooperativa Mikro no Pequena Empreza, Reinaldo Borges hatete, ko’alia sobre kooperativa ne’e fasil maibé jestaun difisil tanba rekursu umanu seidauk preparadu.

“Ne’e mak ba futuru ba postu ida harii kooperativa ida sé bele. Atu kooperativa la’o ne’e ita tenke halo konsolidasaun maka’as liu hodi esplika didi’ak ba povu, tanba ne’e mak ami servisu hamutuk ho administradór postu para orsida bá ne’e xefe suku no aldeia iha enkontru mai hotu hodi esplika didi’ak lala’ok kooperativa ne’e oinsá,” Reinaldo hatete iha Bébora-Dili, ohin.

Bainhira iha futuru mak iha orsamentu subvensaun públika maka ba grupu sira ne’ebé la’o ona di’ak liu halo edifísiu ida ba sira para bele konsentra hamutuk.

Reinaldo esplika agora ne’e dala ruma iha postu ida mós seidauk iha kooperativa tanba ne’e husi parte diresaun nian halo estudu viabilidade ida  ho administradór postu nian, xefe suku no aldeia hodi estuda iha fatin sira ne’e katak iha posibilidade bele harii kooperativa ka lae.

“Ita bá fatin ida dehan harii hela ne’e ladún di’ak, ita hanoin hela ita bá enkontru ho sira katak ida ne’e nesesita duni tanba ema sira durante ne’e osan gasta de’it, labele rai di’ak entaun ho dalan ida ne’e mak ita halo konsolidasaun no lalika harii uluk maibé halo promosaun uluk lai para sira sente katak kooperativa fó duni benefísiu mak sira nia hakarak atu hahú prosesu harii kooperativa, ida ne’e mak ita tuun ba fasilita.”

Daudaun ne’e diresaun halo ona estudu viabilidade ba fatin sira ne’ebé atu estabelese kooperativa no planu mak pelu menus munisípiu ida halo ba postu postu tolu uluk eseptu Autoridade Munisipál Dili.

 (Jornalista : Maria Auxiliadora)

(Editór : Manuel Pinto)

HUSIK IDA HATÁN