Timor-Leste Sei La Hatodan ASEAN

0
210

DILI, (TATOLI) – Vise-ministru Negósiu Estranjeiru no Kooperasaun, Roberto Soares hatete adezaun Timor-Leste hodi sai membru ASEAN (Association of Southeast Asian Nations) la’ós atu sai naha todan, sai obstakúlu ka atu tane liman ba organizasaun aziátika maibé atu kontribui ho nia potensialidade.

Roberto Soares

“Halo Timor-Leste nia prestíjiu, nia naran mós morin no boot liutan liliu hodi asegura ita-nia indepedénsia, ita-nia soberania no ita-nia integridade teritoriál”, hatete nia ba jornalista sira hafoin partisipa komemorasaum tinan 50 ASEAN nian iha embaixada Filipina, Farol, Dili, ohin.

Nia informa, tinan ne’e, membru ASEAN sira halibur hamutuk iha Filipina, halo diskusaun ida ne’ebé mak kle’an mós ba Timor-Leste nia dezeju hodi adere ba organizasaun rejionál ne’e.

Sira haree no halo análize ida kle’an ba estudu independente ne’ebé husi nasaun ASEAN sira ne’ebé mak haruka mai hodi haree Timor-Leste nia prontidaun iha pilár importante tolu atu sai ba membru ASEAN.

Hanesan mós haree implikasaun, aspetu polítika no seguransa, ekonomia no sósiu-kulturál nian. Husi estudu sira ne’e, foin lalais, reuniaun iha Filipina, sira dehan membru nasaun ASEAN sira tomak kontente haree ba progresu Timor-Leste nian iha aspetu tolu ne’e.

Tempu badak sira sei deside, depois hahú lori TL atu partisipa iha atividade ASEAN nian hanesan dalan ida atu lori TL besik liutan ba ASEAN hodi sai membru iha futuru.

Signifika, adezaun ne’e la’ós ona iha dúvida ka diskordánsia maibé agora iha kestaun tempu bainhira loos mak sai membru.

“Tanba ne’e husi Timor-Leste ita sempre reitera katak kestaun bainhira loos mak tama ASEAN, ita husik ASEAN mak deside ho sira-nia matenek ka sabedória”, akresenta.

Vise-ministru ne’e informa, governu liuhusi Ministériu Negósiu Estranjeiru no Kooperasaun nomeia nia hodi partisipa no kongratula aniversáriu ASEAN nian ba dala-50 ne’ebé hala’o iha embaixada Filipina iha Timor-Leste. Nune’e mós ba nasaun fundadór organizasaun ne’e.

“Fundadór ASEAN, sira-nia vizaun di’ak tebes hodi tau hamutuk nasaun sira iha sudeste aziátiku atu bele kontinua nafatin kompromete ba paz no dezenvolvimentu iha rejiaun”, apresia.

Nia reforsa, durante evolusaun ASEAN, husi organizasaun ida ne’ebé mak laduun iha baze legál ne’ebé mak forte, to’o ohin loron, haree katak iha liutan ona baze legál ne’ebé mak forte hodi transforma ASEAN ba oin.

Ho nia objetivu di’ak liutan atu bele dinamiza liutan polítika arkitetura hodi koresponde ba aspirasaun povu iha rejiaun sudeste aziátiku.

Ohin loron ASEAN dezenvolve vizaun no misaun bazea ba pilár importante polítika no seguransa, ekonomia nomós sosiál no kultura. TL nu’udar Nasaun ida ne’ebé nia lokalizasaun jeográfika pertense kedas ba rejiaun ida ne’e no polítika esterna sempre fó prioridade ba integrasaun iha rejionál ne’e.

Dala ida tan, TL reitera ba país membru ASEAN ne’ebé mak sira-nia reprezentasaun iha Dili hodi rona no sente kona-ba konsisténsia polítika TL nian atu sai membru.

“Ita hein katak bainhira ASEAN deside loloos ona atu simu Timor-Leste sai membru ASEAN nian konserteza ita sei revela ka projeta di’ak liutan espesialidade Timor-Leste nian nomós papel saida mak Timor-Leste bele halo, bele kontribui maka’as, dinamiza liutan polítika arkitetura ASEAN nian”, nia espera.

Embaixadora Malázia ba Timor-Leste, Citra Devi A.Pramiah hateten, eleisaun prezidensiál no lejislativa ne’ebé hala’o iha 22 jullu, organiza rasik husi timoroan sira la’o di’ak no transparante tebes nune’e mós haree progresu barak.

“Kada loron, kada semana no fulan, dezenvolvimentu hahú la’o maka’as no ema barak ona hatudu sira-nia interese atu mai no iha Timor-Leste, nune’e mós ema husi Malázia”, nia louva.

Diplomata malázia ne’e informa ASEAN tau ona atensaun no hahú halo diskusaun kona-ba TL nia adezaun ba ASEAN. Hein desizaun saida mak sei iha dialógu ne’ebé la’o hela dadauk iha Manila, Filipina iha nível ministru, haree ba kestaun oioin.

Nasaun ne’e presiza liutan hala’o formasaun kapasidade, iha ne’ebé nasaun membru ASEAN sira fó ona apoiu no kompromisu foun.

“Nasaun 10 sei fó ajuda iha capacity building ba Timor-Leste nomós apoiu ne’ebé di’ak liutan ba nasaun ne’e, iha nia adezaun”, konklui.

ASEAN harii iha Bankok, Tailándia, iha loron 8 agostu 1967 husi Indonézia, Malázia, Filipina, Singapura no Tailándia bazea ba deklarasaun Bankok.

Reprezenta husi Adam Malik (Indonézia), Narsisco Ramos (Filipina), Tun Abdul Razak (Malázia), S. Rajaratnam (Singapura) noThanat Khoman (Tailándia).

Atualmente nasaun membru ASEAN kompostu husi Indonézia, Malázia, Tailándia, Filipina, Singapura, Brunei Darussalam, Vietnam, Laos, Myanmar (Burma) no Kambodia.

Entretantu partisipa iha komemorasaun ASEAN ba dala rua ne’ebé hala’o iha Timor-Leste, ohin, partisipa husi diplomata eh embaixadór nasaun reprezentante organizasaun ne’e nian inklui  autoridade sosiál no reliojioza no komunidade ASEAN sira.

Jornalista: Rafy Belo

Editora: Rita Almeida

HUSIK IDA HATÁN