Timor-Leste Halo Belun ho Ema Hotu

0
135
Mapa Timor-Leste

DILI, (TATOLI) – Timor-Leste halo belun ho ema hotu iha rejiaun nomós mundu no la halo inimigu iha nia relasaun ho komunidade internasionál sira.

“La halo inimigu ba ema ida sai nu’udar prinsípiu fundamentál iha polítika esterna Timor-Leste ninian”, hateten vise-ministru negósiu estranjeiru, Roberto Soares iha salaun MNEK, Praia dos Coqueiros, ohin.

Reprejentante ministru, Hernani Coelho ne’ebé partisipa eventu entrega retratu mandatu sestu governu konstitusionál hatutan, susesu eleisaun prezidensiál no lejislativa organiza ho di’ak tebes tuir padraun internasionál nian.

Eleisaun prezidensiál hala’o iha marsu no lejislativa ne’ebé kompete husi partidu polítiku 21 iha jullu. Eleisaun rua ne’e organiza rasik husi autoridade no povu timoroan sira la ho asisténsia husi ONU (Organizasaun Nasaun Unida).

“Ha’u fiar katak ho governu ne’ebé sei mai, sei tuir mai, sei lori Timor-Leste ba dezenvolvimentu ida ne’ebé aas liu iha ita-nia istória rai lulik, Timor-Leste”, espera vise-ministru Roberto Soares ne’ebé nu’udar mós sobrevivente ida husi Masakre Santa Cruz.

Ministru Hernani Coelho dadaun ne’e halo vízita ba rai liur.

Entretantu, relasaun internasionál Repúblika Demokrátika Timor-Leste (RDTL) konsagra ona iha nia konstituisaun hafoin restaurasaun indepedénsia, liliu iha artigu 8o entre artigu 170o ne’ebé elabora husi membru Asembleia Konstituante.

Jornalista: Rafy Belo

Editora: Rita Almeida

HUSIK IDA HATÁN