DILI, (TATOLI) – Tékniku Ministériu Finansa preparadu ona oinsá bele asegura ba atraza iha diskuzaun Orsamentu Jerál Estadu (OJE) 2018 mak utiliza orsamentu duodésimu.
Diretor Nasionál Orsamentu Jerál Estadu, Ministériu Finansa (MF), Salomão Yoaquim informa meiu husi asegura mak ba saláriu, despeza operasionál hodi dudu mákina Estadu nian tenke la’o nafatin.
“Ne’e hakarak ka lakohi ita atravesa orsamentu duodésimu nian, talvez mós iha desizaun polítika dehan bele halo pagamentu ba projetu sira ne’ebé hein hela karik orsamentu aprova kleur liu mós laiha buat ida, ita la’o ho orientasaun”, Salomão informa ba TATOLI bainhira hetan autorizasaun husi mídia MF nian iha Aitarak-Laran, ohin.
Diretór ne’e fiar katak iha termu saláriu laiha impaktu tanba tinan-tinan la’o bainhira OJE hetan legalizasaun tarde. Atu prejudika ka la’e tékniku MF mak tenke asegura ida ne’e no iha estratéjia oioin ne’ebé mak MF prepara.
“Ita labele dehan polítiku sira mak fó estratéjia para tékniku sira la’o, ne’e la’e maibé sira fó orientasaun depois estratéjia sira ne’e husi tékniku mak la’o no iha meiu barak oinsá bele aselera ida ne’e to’o ikus ita bele hetan rezultadu ne’ebé di’ak no iha kualidade”.
Sobre dikusaun orsamentu retifikativu no OJE 2108, tékniku sira trasa hotu ona kalendáriu no atividade saida atu halo, sé mak atu servisu hamutuk mós iha ona no preparasaun ba delegasaun atu fó kompeténsia dokumentu sé mak atu hakerek mós tarata hotu ona hodi hein orientasaun para bele hala’o.
Salomão Yoaquim hatete maske diskusaun tarde maibé nu’udar tékniku presiza ajusta-án hodi buka meiu ba prosesu preparasaun iha tempu loron no kalan ho tempu ne’ebé limitadu tenke espanta-án iha oras kalan para bele asegura prosesu orientasaun ba interese nasionál nian.
“Preparasaun ba orsamentu retifikativu no Orsamentu Jerál Estadu tékniku preparadu hotu ona no ami prontu ona para bele hala’o serbisu sira ne’e iha kualkér tempu tantu loron ba kalan. Agora ne’e ami hein de’it orientasaun kuandu nia tuun mai ami hala’o de’it ona”.
Jornalista: Maria Auxiliadora
Editora: Rita Almeida
