Sosiedade Sivíl Tenki Bolu Atensaun Kuandu Estadu Sala

0
74
Reprezentante UNDP, Mariano Quintão Reprezentante UE, Simon Legrand no Diretór Ezekutivu FONGTIL, Arsenio Pereira da Silva iha semináriu nasionál ba organizasaun sosiedade sivíl iha monitoria sosiál ba finansa públika.

DILI (TATOLI)- Reprezentante Uniaun Europea (UE), Simon Legrand hatete Sosiedade Sivíl Timor-Leste iha papél klaru atu dezempeña kona-ba xamada atensaun ba poténsia falla iha servisu no programa prestadu  husi  Estadu, espesífiku iha kazu inkumprimentu ba kompromisu ne’ebé delineadu iha polítika, orsamentu no planu ne’ebé aprezenta husi Governu.

“Organizasaun sosiedade sivíl no órgaun komunikasaun sosiál ho objetivu komún ida reforsa sistema pezu no kontrapezu iha modu autór estatál no naun estatál bele dezempeñu plenamente papél ida-idak iha fiskalizasaun no akompañamentu polítika, partisipa ativamente no garante supervizaun ida no kontrolu regulár ba prestasaun servisu públiku”, Simon hatete iha semináriu nasionál ba organizasaun sosiedade sivíl iha monitoria sosiál ba finansa públika ne’ebé organiza husi FONGTIL, iha Otél Ramelau, ohin.

Reprezentante UE ne’e hatete tan empeñu Uniaun Europea iha promove kapasitasaun institusionál no promosaun diálogu no kooperasaun entre instituisaun Estadu sira ho responsabilidade iha supervizaun no jestaun finansa públika.

UE liuhusi Pro-PALOP ne’ebé fianansia projetu mellora responsabilidade Governu liuhusi auditoria sosiál ne’ebé implementa husi FONGTIL no Fundasaun Ázia ho objetivu prinsipál mak hadi’ak prestasaun servisu públiku através, presizamente, atividade monitoria sosiál husi organizasaun sosiedade sivíl nian.

Reprezentante United Nations Development Programme (UNDP), Mariano Quintão hatete importante tebes ba sosiedade sivíl atu ezerse papél nu’udar organizasaun naun governamentál (ONG) no nu’udar timoroan atu tau esforsu tomak hodi asegura prosesu dezenvolvimentu Timor-Leste ba oin.

Tanba sosiedade sivíl dezempeña papél fundamentál ida iha prosesu monitorizasaun sobre forma oinsá utilizasaun fundu públiku nian.

Nune’e FONGTIL realiza semináriu nasionál atubele atribui organizasaun sosiedade sivíl nasionál no nivel munisípiu nian koñesimentu informasaun sobre monitoria sosiál iha konta públika nomós permite troka esperiénsia sobre mellór prátika iha ámbitu papél sosiedade sivíl dezempeña iha monitoramentu no kontrolu programa no projetu governamentál.

Diretór Ezekutivu FONGTIL, Arsenio Pereira da Silva hatete tinan rua liubá FONGTIL asina akordu ida atu halo auditoria sosiál hanesan atu komplementa liuliu ativiadade auditoria sosiál, monitorizasaun no kontrolu sosiál para mellora liután dezenvolvimentu liuliu ezekusaun OJE.

Tanba Tinan-tinan kuandu iha orsamentu Estadu FONGTIL sempre halo submisaun ba Parlamentu Nasionál ba komisaun kona-bá finansa públika nian ne’ebé rezultadu husi monitoring sira ne’e FONGTIL lori ba aprezenta no fó mós hanoin liuliu ministériu sira ne’ebé presiza para nia impaktu no benefísiu direta ba iha povu para bele muda moris povu nian.

FONGTIL espera iha lejislatura foun mai sei kontinua halo auditoria sosiál nafatin no fó submisaun tanba membru FONGTIL lubuk ida mak monitoriza ba finansa públika atu iha transparánsia.

(Jornalista : Maria Auxiliadora)

(Editór : Manuel Pinto)

HUSIK IDA HATÁN