Semana ne’e FRETILIN, PLP no KHUNTO Diskute Plataforma Governasaun

0
755
Sekretáriu Jerál partidu FRETILIN, Marí Alkatiri ko'alia ho jornalista sira hafoin relata rezultadu enkontru ho partidu ne'ebé hetan asentu iha Parlamentu Nasionál ba Prezidente Repúblika, Francisco Guterres Lú Olo iha Palásiu Prezidente Nicolau Lobato Bairo Pite, ohin. Foto Tatoli/Xisto Freitas

DILI, (TATOLI) – Partidu Frente Revolusionariu Timor-Leste Indepéndente (FRETILIN), Partidu Libertasaun Populár (PLP) ho Kmanek Haburas Unidade Nasional Timor Oan (KHUNTO), kuarta (16/8) semana ne’e sei túr hamutuk hodi diskute plataforma governasaun.

“Ami prepara ona karta hodi konvida estrutura PLP no KHUNTO para ami bele túr hamutuk deskuti plataforma governasaun iha bainrua (kuarta)”, Sekretáriu Jerál (SekJer) FRETILIN, Marí Alkatiri ba jornalista sira iha Palásiu Prezidente Nicolau Lobato Bairu-Pité hafoin sorumutu ho Xefe Estadu, ohin.

Sekjer FRETILIN ho komitiva hato’o relatóriu hasoru malu ne’ebé durante ne’e FRETILIN halo ho partidu sira seluk kona-ba formasaun governu ba Prezidente Repúblika, Francisco Guterres Lú Olo.

Marí informa bainhira diskusaun ba plataforma governasaun foun ne’e finál ona, sei aprezenta ba Prezidente Repúblika, nune’e bele nomeia Primeiru Ministru.

Nia optimista katak partidu PLP no KHUNTO konsistente ba sira nia deklarasaun atu túr hamutuk ho partidu mais votadu para deskute kona-ba modelu governasaun ida di’ak liu atu serbi povu.

Partidu FRETILIN ne’ebé hetan kadeira 23 iha Parlamentu Nasionál halo ona negosiasaun ho partidu sira hanesan partidu Kongresu Nasionál Rekonstrusaun Timor (CNRT-sigla portugés) kadeira 22, PLP kadeira ualu, Partidu Demokrátiku (PD) kadeira hitu, no KHUNTO kadeira lima, hodi forma sestu governu.

Jornalista: Xisto Freitas

Editora: Rita Almeida

HUSIK IDA HATÁN