Retratu Governu Aprezenta Atividade Dezenvolvimentu

0
136
Ministru Estadu Prezidensia Konsellu Ministru, Agio Pereira akompaña hosi Xefe Governu iha lansamentu retratu mandatu governu.

DILI, (TATOLI) – Ministru Estadu Prezidensia Konsellu Ministru, Agio Pereira hateten retratu mandatu sestu governu konstitusionál tinan 2015 to’o 2017 aprezenta polítika, projetu no atividade dezenvolvimentu.

“Retratu ida ne’e aprezenta polítika, projetu no atividade dezenvolvimentu ne’ebé sestu governu konstitusional apóiu dezenvolvimentu sustentável no espesiál liu dezenvolvimentu ekonómiku sosiál ka hanesan lori ba públiku importansia ne’ebé halo durante mandatu, atu hadi’a kondisaun vida ba populasaun sira”, hatete nia iha diskursu seremonia lansamentu retratu mandatu sestu governu iha salaun Ministériu Negosiu Estranjeiru no Koperasaun (MNEK), Praia dos Coqueiros, ohin.

Hodi dehan tan, marka ida signifikativu ba servisu tinan rua ho balun no hanesan matadalan ba programa governu ho ninian objetivu ne’ebé define ona iha Planu Estratéjiku Dezenvolvimentu Nasionál.

Nune’e governante ne’e iha esperansa katak inisiativa no programa sira ne’ebé relata iha retratu sestu governu bele produz rezultadu di’ak.

Nia dehan tan, entrega prosesu governasaun ba ministériu oin-oin, permite governante sira atu passa mandatu ne’e ba ezekutivu foun iha país ne’e ne’ebé dezeja bele fó impulsu foun ba sosiedade sira, no kria rota ne’ebé klaru husi dezenvolvimentu sustentável ne’ebé labele muda no tenke tau atensaun ba interesse povu nian.

Jornalista: Julia Chatarina

Editora: Rita Almeida

HUSIK IDA HATÁN