RAKOM Labele Toka De’it Múzika

0
28

ATAÚRO, (TATOLI) – Sekretáriu Estadu Komunikasaun Sosiál, Nélio Isaac Sarmento enkoraja jestór no voluntáriu Rádiu Komunitáriu (RAKOM) atu labele toka de’it múzika maibé transmite mós informasaun relasiona ho atividade komunidade sira nian lorloron.

“Múzika oituan, informasaun oituan kona-ba saida mak akontese iha Ataúro no rai laran”, hateten Sekretáriu Estadu Komunikasaun Sosiál, Nélio Isaac iha nia intervensaun bainhira inagura Rádiu Komunitáriu Manukoko, 99.00 MHz iha Postu Administrativu Ataúro, fim-de-semana ne’e.

Rádiu komunidade mai husi esperiénsia pasadu ne’ebé ho susar maibé ho hanoin di’ak sira bele halibur sai mehi ida, harii rádiu fasilita informasaun. Seidauk kompleta maibé neneik sei ba oin.

Nia esplika, ko’alia kona-ba rádiu komunidade ne’e katak komunidade sira mak na’in ba rádiu no sasan ho maneira voluntáriu.

Komunidade sira sente katak rádiu ne’e sira nian, sira mak iha obrigasaun atu mai partisipa hodi dezenvolve buat ne’ebé mak hakarak halo. “Ho úniku ida ne’e de’it mak ita bele haboot nia, ita bele tane nia”, katak.

Hatutan tan, kuandu la kuidadu, lakohi mai dudu ba oin, la sente hanesan na’in mak bainhira inagurasaun, aban bainrua posibilidade la iha tan.

Hakarak bolu atensaun ba komunidade no autoridade lokál sira katak seidauk kompleta maibé neneik tempu ida sei kompleta. “La’ós de’it iha ha’u-nia mandatu maibé iha tempu tuir mai sei bele kontinua”, akresenta.

Tanba ida ne’e diretór jerál no diretór sira seluk ho obrigasaun atu tane nafatin povu ida ne’e, komunidade sira no autoridade sira. “Ha’u (SEKOMS) bele ba ona, seluk bele ba maibé diretór sira sei nafatin hodi tane buat ne’ebé forma”, reforsa.

Dala ida tan, importante liu ba iha komunidade sira mak rádiu komunidade ne’e atu serbi de’it komunidade iha Ataúro liliu informasaun sira ne’ebé mak iha relasaun ho sira-nia atividade lorloron.

Ho situasaun sira hanesan ne’e rádiu presiza atu informa atu nune’e komunidade sira bele partisipa, anima no konversa ho autoridade lokál sira kona-ba saida mak sira enfrenta.

Bele mós Ministériu Saúde halo imunizasaun ruma no instituisaun sira seluk, rádiu bele kontribui fó hatene ba komunidade sira, bele mós atividade peska nian sira nian ne’ebé susesu, mai konta iha rádiu hodi fahe mós esperiénsia ba sira seluk.

Liuliu mós ajuda sidadaun sira, iha fiar relijiaun. Igreja mós bele utiliza transmite doutrina igreja ka fiar nian. “Ida ne’e esensiál tebes husi rádiu komunidade, nia servisu mak ne’e”, haklalen.

Kriasaun rádiu komunidade loke mós oportunidade ba organizasaun sira ne’ebé mai, ho misaun sira hanesan sosiedade sívil sira hodi apoiu, uza rádiu komunidade, sira sei kontribui mós ba jestaun no funsionamentu rádiu nian.

La’ós osan mak buka maibé importante mak ema hotu partilla, sente katak na’in ba rádiu. SEKOMS hameno no fó mós konfiansa ba diretór sira katak iha governasaun foun mai se bele tau atensaun liutan atu bele uza rádiu ne’e. Nune’e mós ba administradór atu bele enkoraja joven sira ne’ebé iha abilidade hodi kontribui ho inisiativa tanba importante. Fó laran tomak atu kontribui, di’ak ka aat.

“Seidauk kompleta, fiar katak iha tempu tuir mai sei la’o di’ak liutan”, konklui.

Januario Soares, komunidade Ataúro ida hateten, prezensa rádiu ne’e bele fasilita no dezenvolve liutan informasaun ba komunidade sira ne’ebé hela iha suku lima iha Ataúro.

“Ha’u mós akompaña rádiu, sujere nafatin atu fó kapasitasaun, formasaun ba sira (voluntáriu sira) nune’e sira nia informasaun bele ba to’o iha fatin hotu”, katak vise konsellu Rádiu Komunitáriu Manukoko ne’e.

Inagurasaun ne’e, SEKOMS mós entrega rádiu 53 ba autoridade lokál lima iha postu administrativu Ataúro mak Beloi, Biqueli, Makadadi, Ataúro vila no Manukoko.

Istorikamente, Rádiu Komunitáriu Manukoko harii ho inisiativa husi padre italianu, Francisco Moser (Padre Chico), fila ona ba Itália tanba moras ho intensaun atu haklaken evanjellu no atividade seluk relasiona ho paróku no komunidade sira iha Ataúro.

Hafoin enkontru bebeik ho amu Chico, hasoru mós esperiente balun kona-ba servisu jornalista no rádiu nian hodi reforsa tan nia prosesu instalasaun.

Instala tiha, rádiu komunitáriu ne’e hetan formasaun husi CRC (Centro Rádio Comunitário) durante semana ida, halo preparasaun, instala no hetan tan apoiu ekipamentu sira iha 2016 hanesan motorizada ida, komputadór ida no ekipamentu nesesáriu balun tan husi CRC.

Rádiu ne’e ho lema: “Hametin Unidade, Haburas Demokrasia, Pás no Justisa” ho transmisaun hahú husi segunda to’o sábadu.

Atividade ne’e partisipa husi komunidade, autoridade lokál sira, autoridade seguransa no sívil, autoridade relizioja no seluk tan.

Jornalista: Rafy Belo

Editora: Rita Almeida

HUSIK IDA HATÁN