Primeiru Dialógu FRETILIN-CNRT “Laiha Rezultadu”

0
3924
Sekretáriu Jerál CNRT, Francisco Kalbuadi Lay ho Sekretáriu Jerál FRETILIN, Mari Alkatiri koalia ho jornalista sira iha Ótel Novu Turismu, Kuarta (09/08).

DILI (TATOLI)—Negosiasaun Partidu FRETILIN ho CNRT, ohin, Kuarta (09/08) laiha rezultadu absoluta ida hodi  forma VII governu konstitusional tanba delegasaun CNRT sei lori relatoriu hodi reuni iha estruktura partidu nian hafoin marka enkontru segundavez.

“Iha intendimentu uituan, naturalmente delegasaun mai hosi CNRT sei lori fila fali rezultadu ba iha ne’eba depois sei marka fali segunda ronda hodi diskuite halo klean liu tan,” Sekretáriu Jerál FRETILIN, Mari Alkatiri esplika ba jornalista sira hafoin enkotru iha Ótel Novu Turismu, ohin.

Alkatiri hatutan, iha enkontru ne’e la konsege hasai senariu ruma ba formasaun governu nian inkluidu CNRT partisipa ho FRETILIN hodi forma VII governu konstitusional.

Nenhum cánario excluído (la iha senariu ruma ne’ebé hasai),” Mari Alkatiri responde ba pergunta jornalista.

Iha oportunidade hanesan sekretáriu jerál CNRT Francisco kalbuadi Lay reforsa enkontru ne’e CNRT so bele konfirma de’it katak, CNRT respeita konvite ne’ebé FRETILIN hato’o.

“Demokrasia mak ida ne’e, ita tenki respeita malu. Mai rona, mai koalia depois ami sei fila fali konvoka reniaun ho Prezidente depois sei iha tempu para atu deside,” Kalbuadi esplika.

Reniaun ne’ebé hala’o durante oras ida resin ne’e parte CNRT partisipa hosi Sekretáriu Jerál Franciasco Kalbuadi Lay, Prezidente Komisaun Dirativa Nasionál-CDN, Dionisio Babo Soares ho Vice Prezidente, Virgilho Smith.

Entertantu parte FRETILIN lidera hosi Dr. Mari Alkatiri no hetan akompañamentu hosi Vice Sekretáriu Jerál Jose Reis inklui Vice Prezidente, Francisco Branco ho Aniceto Guterres.

Tuir ajenda aban, Kinta (10/08) FRETILIN kontinua enkontru ho Partidu Libertasaun Popular, tuku 9H30.

(Manuel Pinto)

HUSIK IDA HATÁN