Prezidenti Repúblika Despede Atleta Nasionál Ba Sea Games

0
407
Prezidenti Repúblika hasai foto hamutuk ho atleta sira hafoin seremónia despedida. Imajen Ajénsia TATOLI/Xisto Freitas

DILI, (TATOLI) – Prezidente Repúblika, Francisco Guterres Lú Olo despede atleta nasionál hamutuk 65 hosi modalidade sia ne’ebé maka atu partisipa jogu Sea Games iha Malázia.

Seremónia despedida ne’e hala’o iha salaun Xina Palásiu Prezidente Nicolau Lobato, Bairu-Pité, Dili, sesta dader no okaziaun ne’e Xefe Estadu husu ba atleta hotu-hotu atu tau espíritu disiplina no rigór, katak reprezenta Nasaun labele halo buat falla ida (irregularidade ka atetudi ladi’ak) durante kompetisaun.

Nia rekomenda ba xefe delegasaun sira hosi Konfederasaun Desportu Timor-Leste (CDTL), Komité Olímpiku no ofisiais hotu atu tau matan ba atleta sira, nune’e sira bele iha vontade tuir kompetisaun.

“Manán ka lakon tenke trata atleta sira ho didi’ak para fila fali mai bele halo preparasaun di’ak”, Lú Olo fó hanoin.

Iha fatin hanesan, Sekretáriu Estadu Juventude no Desportu, Leovigildo Hornai hateten sira mai hasoru Xefe Estadu atu hetan liafuan espíritu no kmanek, nune’e bele motiva atleta sira.

“Ha’u espera katak prezensa iha ne’e (Palásiu Prezidensiál) bele hetan liu-tan espíritu, motivasaun no determinasaun ne’ebé forte ba atleta sira hodi ba kompete”, hatutan.

Nia iha esperansa katak maske Timor-Leste nasaun ki’ik ne’ebé kompete ho nasaun boot sira maibé sei hatudu prestasaun di’ak, katak sei manán. Modalidade individuál sira hanesan Tekwondo, Atletizmu, Boxing no sira seluk sei hetan medalla.

Hornai informa, orsamentu ne’ebé maka governu aloka ba modalidade sira hodi halo preparasaun no to’o iha kompetisaun hamutuk $400,000 itál.

Kontijenti liu-liu modalidade Futeból sei aranka uluk iha aban meiudia no modalidade sira seluk sei tuir.

Abertura ba Sea Games sei hala’o iha 19 agustu.

Jornalista: Xisto Freitas

HUSIK IDA HATÁN