Prezidente Repúblika Preokupa Kondisaun Bolseiru Timoroan iha Kabo Verde

0
153
Enkontru entre PR Lú-Olo no PM Rui iha Palásiu Prezidente Nicolau Lobato, ohin dader. Imajen Mídia Palásiu PR.

DILI, (TATOLI) – Primeiru Ministru, Rui Maria de Araújo hala’o enkontru rutina ho Prezidente Repúblika, Francisco Gutrerres Lú Olo hodi ko’alia kona-ba problema ne’ebé maka oras ne’e bolseiru timoroan sira hasoru iha Kabo Verde.

Xefe Estadu preokupa tebes estudante hirak ne’e nia kondisaun no husu governu atu hola medida urjentu ba problema refere, tanba bolseiru sira ne’e hetan ameasa hosi kriminozu caboverdianu, tan ne’e durante loron barak ona lakon sira nia estudu no prefere hakarak fila mai Timor-Leste.

Primeiru Ministru responde katak governu haruka ona ekipa entre Ministériu Edukasaun ho Fundu Dezenvolvimentu Kapitál Umanu ba halo apuramentu faktu no konsege rekolla faktu lubuk boot ida no nia relatóriu sei hato’o ba Prezidente Repúblika.

“Agora dadauk Ministériu Edukasaun serbisu hamutuk ho Ministériu Negósiu Estranjeiru atu haruka asistente adidu ba Kabo Verde para halo akompañamentu ne’ebé direta ba estudante sira”, dehan Primeiru Ministru ba jornalista sira iha Palásiu Prezidente Nicolau Lobato, Bairu-Pité, Dili, kinta ne’e.

Governante ne’e haktuirk molok simu bolsu estudu, bolseiru asina kontratu ida ho governu no kontratu ne’e hateten klaramente katak bainhira la konsege akaba estudu, estudante sira tenke fila no sé hakarak transfere ba universidade seluk, ida ne’e iha Timor ona maka toma fali konkursu foun atu hetan fali bolsa ba fatin seluk.

Biban ne’e, Xefe Governu mós ko’alia kona-ba Prezidente nia viajen atu reprezenta Estadu iha Asembleia Jerál Nasoens Unidas setembru tinan ne’e. Kalendáriu polítiku fulan setembru agora bainhira governu foun iha ona sei iha orsamentu retifikativu hodi fasilita prezidente nia viajen. Ne’e maka artikulasaun entre Kaza Sivíl Prezidensia ninian ho Ministériu Finansas la’o nafatin para oinsá prosesu viajen prezidente nian labele interompidu.

Rui de Araújo mós ko’alia ho Prezidente kona-ba Aniversáriu FALINTIL iha 10 Agustu. Prezidenti husu ba governu atu fasilita grupu muzikál ida ne’ebé foin lalais lansa CD kona-ba múzika rezisténsia nian atu partisipa iha selebrasaun 20 agustu no okaziaun ne’e Primeiru Ministru entrega CD múzika rezisténsia ba Prezidente Repúblika.

Jornalista: Xisto Freitas

Editora: Rita Almeida

HUSIK IDA HATÁN