Prezidente Repúblika Orgullu Nu’udar Patronu Ba UNE-TL

0
81
Prezidenti da Repúblika eleito, Francisco Guterres Lu-Olo

DILI (TATOLI)–Prezidente Repúblika, Dr. Francisco Guterres Lú Olo agradese no sente onradu ho konvite ne’ebé simu hosi UNE-TL, nu’udar patronu ba União Nacional dos Escuteiros de Timor-Leste/UNE-TL.

UNE-TL la’ós de’it organizasaun nasionál, rekoñesidu hosi Governu Timor-Leste, maibé tama ona mós, nu’udar membru ba Organizasaun Mundiál Movimentu Eskutista. Ida ne’e fó orgullu ba ita hotu tanba hatudu katak  UNE-TL hatuir mós espíritu no valores hanesan eskuteiru sira seluk,  namkari iha mundu tomak.

“Inisiativa ne’ebé UNE-TL hala’o ba tinan ida ne’e, iha fulan ida nia laran, halibur foin-sa’e sira, mane no feto,  hosi munisípiu lima no mós hosi Austrália. Ida ne’e oportunidade di’ak ida atu hametin liután prinsípiu sira ne’ebé ita hotu haksolok hanesan: lealdade, dixiplina, fó-liman ba malu, hadomi malu no espíritu fó-an tomak atu serve família, sosiedade no estadu,” Lú Olo hato’o argumentu ne’e liuhusi komunikadu ofisiál hosi Mídia Palásiu Prezidente Repúblika ne’ebé Ajénsia TATOLI simu iha kinta ne’e.

Prezidente Repúblika defende valór no prinsípiu sira ne’e. Iha 20 Agostu 2017, loron  FALINTIL nian, Prezidente Repúblika konvida Governu Timor-Leste atu haree oinsá harii Serbisu Síviku Nasionál ida ne’ebé envolve timoroan hotu-hotu.

Prezidente Repúblika fiar katak Serbisu Síviku, organiza hosi governu Timor-Leste,  bele ajuda família no profesór sira atu haburas liu-tan karater ema ida-idak nian,  atu ida-idak sai sidadaun responsavel no patriótiku.

“Ha’u fiar katak akampamentu ida ne’e sei hasa’e liu-tan valores no prinsípiu ne’ebé UNE-TL hakarak hatutan ba foin-sa’e sira, feto no mane,” Xefe Estadu afirma.

(Jornalista: Xisto Freitas)

(Editór : Manuel Pinto)

HUSIK IDA HATÁN