Prezidénsia Repúblika Asina Akordu Kooperasaun ho UNTL

0
158
Xefi Kaza Sivíl PR, Francisco Maria de Vasconselhos (liman karuk) no Reitór UNTL, Francisco Miguel Martins (liman loos) iha ámbitu asina akordu kooperasaun iha Palásiu Prezidenti Nicolau Lobato. Imajen Mídia Palásiu PR.

DILI (TATOLI)–Xefe Kasa Sivíl (XKS) Prezidénsia Repúblika, Francisco Maria de Vasconselhos, kuarta loro kraik ne’e, asina akordu kooperasaun ho reitór Universidade Nasionál Timor-Lorosa’e (UNTL), Francisco Miguel Martins, hodi fó kapasitasaun lian portugeza ba funsionáriu públiku no ajente politic appointment.

“Kooperasaun ne’e husu ba UNTL atu fó tulun ka fó formasaun ba funsionáriu públiku no funsionáriu sira ne’ebé maka hotu-hotu iha Palásiu, atu bele aprende di’ak liu-tan ita nia língua ofisiál portugeza atu nune’e ita bele halo serbisu di’ak liu-tan. Tanba ne’e, prezidensia-da-Repúblika tenke hatudu ona komportamentu hodi aprende lian portugeza nune’e iha prestasaun serbisu di’ak,” Xefe Kasa Sivíl, Francisco Maria de Vasconselhos dehan iha serimónia asina akordu iha Palásiu Prezidente Nicolau Lobato, Bairru-Pité, Dili.

Nia dehan UNTL únika instituisaun Estadu nian tenke fó konfiansa, nune’e universidade la’ós de’it sai fatin ba eskola, maibé sai mós fatin ba sentru pensamentu.

Iha parte seluk, Reitór UNTL Francisco Miguel, sente ornadu no iha responsabilidade morál, étika no polítika atu eleva kapasidade sidadaun hotu-hotu ne’ebé mak serbí iha instituisaun Estadu.

“Ami sente orgullu, konsiderasaun ida boot tebes ba Universidade Nasionál Timor-Lorosa’e, hodi kolabora fó kursu língua portugeza ba ita nia servidór sira ne’ebé agora daudaun serbí hela iha uma fukun Palásiu Prezidente,” Reitór tenik.

Iha serimónia asina akordu kooperasaun ne’e, partisipa mós hosi Diretór Jerál Prezidensia, diretores no koordenadores inklui mós dirijentes hosi UNTL.

 (Jornalista: Xisto Freitas)

(Editór : Manuel Pinto)

HUSIK IDA HATÁN