iklan

NASIONÁL, DESPORTU

Ponta Leste Hetan pontus 18 Iha Segunda Epoka LFA

Ponta Leste Hetan pontus 18  Iha Segunda Epoka LFA

Ekipa AS Ponta Leste. Imajen Mídia LFA

DILI (TATOLI)—AS Ponta Leste okupa segunda pozisaun iha jornada 11 primeira divizaun Liga Futeból Amadora (LFA) segunda époka, hafoin halakon Carsae FC ho golu 2-1 iha jogu ne´ebé hala´o iha Estádiu Munisipál Baucau, Sábadu (5/8).

Oras ne´e, AS Ponta Leste hetan pontus 18 hosi jogu 11, manán 5, impata 3, lakon 3 no falta jogu 3, hanesan mós ho ekipa SLB maibé hetan diferensia golu di´ak liu. Entretantu, Carsae FC nafatin okupa pozisaun 4 ho pontus 14, jogu 11, manán 3, impata 5 no lakon 3.

Golu Carsae FC hatama hosi Nidio Neto iha minutu 49. Entretantu, golu AS Ponta Leste hatama hosi Jorge Alves iha minutu 4 no 45.

Iha parte seluk, ekipa Karketu Dili FC hakbesik liu-tan nia pozisaun ba eskada kampiaun Primeira Divizaun Liga Futeból Amadora époka 2017, ne´ebé tama ona ba jornada 11 no husik hela jornada 3 antes ramata époka ida ne’e, hafoin iha jogu segunda volta, jornada 11, ekipa kampiaun LFA époka 2015, AD SLB só bele fahe pontus alias impata 0-0 kontra Académica FC iha jogu ne´ebé maka hala´o iha Estádiu Malibaka, Munisípiu Bobonaro, sábadu horibainrua.

Resultadu ida ne’e, lori SLB mós tenki simu realidade hodi tún hikas ba pozisaun 3 lugár tanba iha loron hanesan mós ekipa AS Ponta Leste manán Carsae FC ho skoru 2-1.

Ho rezultadu ida ne’e maka lori AD SLB ne´ebé durante ne’e túr iha segunda pozisaun tenki tún hikas ba pozisaun terseira lugár iha jornada 11 ho pontus 18 hosi jogu 11, manán 5, impata 3, lakon 3 no husik hela jogu 3.

Académica FC, nafatin okupa pozisaun 6 ho pontus 11 hosi jogu 11, manán 2, impata 5 no lakon 4.

(Jornalista: Xisto Freitas)

(Editór : Manuel Pinto)

 

iklan
iklan

Leave a Reply

iklan
error: Content is protected !!