PNTL Husu Komunidade Labele Fiar Mensajen ‘Deskoñesidu’

0
80
Komandante Jerál Polísia Nasionál Timor-Leste (PNTL), Komisáriu Júlio da Costa Hornay hatan jornalista sira hafoin enkontru ho Xefe Estadu iha Palásiu Prezidensiál Nicolau Lobato Bairo Pite, ohin. Foto Tatoli/Xisto Freitas

DILI, (TATOLI) – Komandante Polísia Nasionál Timor-Leste (PNTL), Komisáriu Júlio da Costa Hornay husu ba komunidade atu lalika fiar cybercrime (mensajen hosi ema deskoñesidu liuhosi email ne’ebé mai hosi liur hodi hatete hetan prejente).

“Ha’u husu ba povu Timor-Leste tomak katak ida ne’e bosokten. Povu barak ona sai vítima ba ida ne’e. Balun transfere osan barak ba maibé prémiu sira ne’e to’o ohin loron la mosu”, Hornay hato’o ba jornalista sira iha Palásiu Prezidenti Nicolau Lobato, Bairu-Pité, Dili, kuarta ne’e.

Nia haktuir dalabarak ona mensajen tama iha telefone no email hodi dehan hetan prémiu hanesan kareta no osan maibé tenke transfere uluk osan ba sira (mafiozu ne’ebé haruka mensajen) para sira bele haruka sasán sira ne’e mai.

Loron ohin Komando Jerál PNTL sei hato’o sirkulár ba polísia munisípiu hotu-hotu para bele intende situasaun refere, nune’e alerta ba populasaun sira atu labele monu ba lasu ne’e.

Jornalista: Xisto Freitas

Editora: Rita Almeida

HUSIK IDA HATÁN