PN Sei Halo Konfirmasaun ba Lei Investimentu Privadu

0
123
Ministru Agrikultura no Peska (MAP) no Ministru Estadu Koordenadór Asuntu Ekonómiku (MEKAE), Estanislau Aleixo da Silva. Foto TATOLI/Egas Cristovão.

DILI, (TATOLI) – Ministru Estadu Koordenadór Asuntu Ekonómiku (MEKAE) no Ministru Agrikultura no Peska (MAP), Estanislau Aleixo da Silva infroma Parlamentu Nasionál  (PN) semana ne’e sei halo konfirmasaun ba lei investimentu privadu ne’ebé Prezidente Repúblika veta tanba lakonkorda ho buat balun.

“Depois konfirmasaun ida ne’e sei hakerek karta ida mós ba Prezidente kona-ba importánsia lei ida ne’e, impaktu lei ida ne’e ba ita-nia setór privadu no la’ós de’it ba diversifikasaun ekonomia ita-nia rai laran. Foin lalais Prezidente bolu ha’u bá, ha’u esplika ba Prezidente, ha’u hanoin Prezidente kala hatene ona, ne’e duni ha’u hein katak ikus mai Prezidente sei promulga”, Estanislau hatete iha Palásiu Governu foin lalais ne’e.

Estanislau hatutan presiza halo esplikasaun ba lei ida ne’e tanba lei ne’e halo, haree ba dezenvolvimentu atuál iha mundu nomós Ázia nian.

“Lei ida di’ak, klaru laiha lei ida perfeitu no importánsia lei ne’e tanba ita-nia lei ida atuál ne’e ita dehan ladún di’ak ona no lei ida agora ita hein sé Prezidente promulga ne’e, lei ida ne’ebé depois permite Estadu bele hetan mós reseita tanba lei ne’e konsentra liubá setór produtivu”.

Lei investimentu privadu ne’e aprova ona husi Parlamentu Nasionál no Prezidente Repúblika halo vetu polítiku, nune’e sei hadi’a de’it iha Parlamentu no sei submete fali ba Prezidente sobre konfirmasaun veta husi Parlamentu nian.

Jornalista: Maria Auxiliadora

Editora: Rita Almeida

Notísia ne’ebé relasiona : http://www.tatoli.tl/2017/07/prezidente-republika-veta-lei-investimentu-privadu

HUSIK IDA HATÁN