PN Leilaun “Prado” Tanba Kilo Metrajen Boot

0
633
Foto Espesial

DILI (TATOLI)–Prezidente Parlamentu Nasionál, Adérito Hugo da Costa hateten Parlamentu Nasionál (PN) leilaun karreta “Prado” ne’ebé durante ne’e deputadu sira uza ba halo fiskalizasaun obra Estadu tanba kilo metrajen boot ona.

Nia informa karreta sira ne’e balun ho kilo metrajen 120.000 ona no balun liu tanba halo fiskalizasaun ba área sira ne’ebé dook.

Prezidente PN, Dr. Adérito Hugo da Costa dadalia ho jornalista sira iha Palásiu Prezidente Nicolau Lobato, ohin meiudia. Imajen Ajénsia TATOLI/Xisto Freitas

“Sujere atu ema hotu bele ba haree karreta hirak ne’e nia kilo metrajen ida pur ida. Deputadu sira nia serbisu liga ho povu espetativa ás tebe-tebes tanba tenke tún ba iha baze kuaze lor-loron,” Hugo ko’alia kestaun ne’e ba jornalista sira iha Palásiu Prezidente Nicolau Lobato, Bairu-Pité, Dili, kuarta ne’e, hodi responde públiku nia preokupasaun kona-ba PN leilaun karreta ba deputadu sira.

Nia esklarese la justu bainhira dehan “Prado” ne’e karreta luxu tanba karreta refere deputadu sira uza hodi tama sai área izoladu hodi halo fiskalizasaun ba obra Estadu.

“Luxu duni maibé uza halo serbisu ba foho. Ha’u dala ruma triste tanba deputadu sira halo fiskalizasaun dook teb-tebes–sira balun ferik no sira balun katuas ona maibé kontinua la’o tanba povu,” Hugo haktuir.

Desizaun leilaun ne’e bazeia ba deliberasaun ne’ebé foti ho koletivamente no kontinua de’it desizaun ne’ebé tomada dezde tinan 2012 liu-ba.

“Mekanizmu ne’ebé iha maka tuir kompeténsia ne’ebé Parlamentu Nasionál iha hanesan autónoma finanseira administrativu, katak PN halo jestaun ba ninia patrimóniu rasik,” nia esplika.

Karreta refere PN sosa ba deputadu sira iha tinan 2012 liu-ba ho folin $45,000 no lelaun fali ba deputadu sira ho folin $8000,00.

(Jornalista: Xisto Freitas)

(Editór : Manuel Pinto)

HUSIK IDA HATÁN