PM : Imprensa Livre Sai Pilár Importante Haburas Demokrasia

0
71
Hafoin simu sertifikadu apresiasaun jornalista sira hasai foto hamutuk ho PM, Rui Maria de Araújo.

DILI, (TATOLI) – Primeiru-Ministru (PM), Rui Maria de Araújo iha ámbitu entrega sertifikadu apresiasaun ba jornalista hamutuk 46 husi instituisaun mídia liuliu ba jornalista korpu Palásiu Governu ne’ebé durante ne’e servisu hodi divulga informasaun relasaun ho programa no atividade dezenvolvidu husi VI Governu Konstitusionál  hatete iha país demorátiku, imprensa ne’ebé livre sai pilár importante hodi bele haburas demokrasia.

Sertifikadu supreza ba DNDI ne’ebé Primeiru-Ministru entrega ba Diretór DNDI, Orlando da Conceição.

Primeiru Ministru iha madatu VI Governu Konstituisonál nia rohan agradese ba jornalista hotu iha Timor-Leste laran tomak liuliu ba jornalista ne’ebé destakadu iha Palásiu Governu ne’ebé durante tinan rua ho balun akompaña servisu ne’ebé Governu halo.

“Ha’u sente kontente tanba relatu sira ne’ebé ita-boot sira halo ne’e ajuda tebes ita-nia povu atu komprende barak liután kona-ba saida mak Governu halo. Iha tinan rua ho balun ita-boot sira hatene katak iha konjuntura polítika foun ida ne’ebé hamosu VI Governu Konstitusionál no VI Governu Konstituisonál kontinua programa ne’ebé mai husi V Governu”, Rui Maria dehan iha nia intervensaun iha Palásiu Governu, ohin.

Ba jornalista sira PM hatutan mais klaru hanesan Konsellu Imprensa nomós Sekretáriu Estadu Komunikasaun Sosiál (SEKOMS) dalabarak ko’alia katak tenke asume responsabilidade ba buat sira ne’ebé ita hakerek.

“Pur tantu ha’u hanoin bainhira ita ida-idak hala’o ita-nia knaar ho di’ak, sé mak sente benefisia, ita-nia povu tomak, ita-nia Estadu, ita-nia nasaun, demokrasia bele buras liután no loke oportunidade, kria ambiente dezenvolvimentu la’o di’ak liután iha ita-nia rai”.

Nune’e PM hato’o tan obrigadu barak ba jornalista sira-nia servisu, no dedikasaun. “Ha’u hatene katak ita-boot sira-nia meiu atu halo servisu sempre di’ak, ita-boot sira presiza halo sakrifísiu barak para bele hetan fonte notísia atubele konsege konfirma notísia sira ne’ebé mak ita-boot sira hetan, maibé ida ne’e parte husi prosesu, parte husi kreximentu ne’ebé nasaun no Estadu atravesa momentu ne’e”.

Iha okaziaun ne’e, PM mós agradese ba SEKOMS ho ekipa tomak ba apoiu tomak ne’ebé fó ba VI Governu Konstitusionál atu lori informasaun no kria imajen ba VI Governu Konstitusionál.

“Hein katak ita hotu sei ida-idak iha nia fatin, depende ba oportunidade no tarrefa foun ne’ebé sei hetan, ita ida-idak sei nafatin servisu, kontribui, dedika ita-nia aan tomak ba dezenvolve rai ida ne’e”.

Nune’e mós, Sekretáriu Estadu asuntu Komunikasaun Sosiál, Nélio Isaac Sarmento iha okazisaun ne’e introdús jornalista sira ba PM ne’ebé mak durante 2015 destaka iha Palásiu Governu no tuir polítika mídia sira-nian, balun mai de’it tinan rua ka tolu.

“Sira iha ne’e, iha sira-nian organizasaun ida naran korpu jornalista Palásiu Governu, sira sempre iha unidade hodi fahe informasaun no sira kompostu husi mídia nasionál, imprime, eletrónika, website”.

Iha biban ne’e SEKOMS mós lori jornalista hotu hodi agradese liuliu Gabinete Primeiru-Ministru nian ne’ebé bele fó oportunidade iha tinan naruk ida ne’e atu hetan informasaun iha palásiu.

Jornalista 46 ne’ebé mak hetan sertifika apresiasaun husi PM mai husi instituisaun mídia sira hanesan Timor-Post, RTTL.EP, STL Media Group, Jornál Independente, GMN-JNDIÁRIO, Timoroman, Rádiu Liberdade, Tempo Semanál, Rádiu Timór Kmanek, Ajénsia Notisioza TATOLI, Ajénsia LUSA no sertifikadu supreza ba Diresaun Nasionál Diseminasaun Informasaun (DNDI).

Jornalista: Maria Auxiliadora

Editora: Rita Almeida

HUSIK IDA HATÁN