PM Fó Instrusaun Atu Kontinua Formasaun Artístika

0
28
Primeiru-Ministru, Rui Maria de Araújo hasai foto hamutuk ho formandu sira ne’ebé tuir formasaun artístika hafoin entrega sertifikadu. Foto/GPM.

DILI, (TATOLI) – Primeiru-Ministru (PM), Rui Maria de Araújo fó instrusaun ba Sekretária Estadu Arte no Kultura liuhusi Diresaun Arte no Kultura atubele kontinua formasaun artístika ba timoroan sira.

“Ha’u agora la’ós fó lia-menon, hakarak fó instrusaun ba Sekretária Estadu Arte no kultura kona-ba kontinuidade prosesu ida ne’e. Mezmu agora ita iha governu jestaun, ita sei hein formasaun governu, prosesu polítiku la’o hela, maibé utilizasaun rekursu ne’ebé ita iha tenke la’o ba oin”, hatete Xefe Governu sesante iha Muzeu Rezisténsia, iha ámbitu enserra formasaun no entrega sertifikadu ba formandu sira ne’ebé tuir formasaun artístika, foin lalais ne’e.

Husu atu Sekretária Estadu mós presiza esplora forma seluk atu fó kontinuidade ba kursu ida ne’e. Ho forma importante ida mak bele halo akordu ida ho universidade no eskola sira atu nune’e bele habelar ba fatin seluk.

“Ida ne’e ita lá presiza hein formasaun Governu, ida ne’e nivel tékniku ne’ebé Sekertária Estadu bele book daudaun ba universidade sira atu loke tan oportunidade ba ita-nia alin sira ne’ebé iha talentu”.

Estadu investe barak ona ho jenerosidade Governu Kuba ninian mak timoroan na’in-sanulu-resun-haat ba tuir formasaun ho kualidade atu sai formadór. presiza aproveita konesimentu iha arte liuliu konesimentu ho espesialidade ne’ebé seidauk halo atubele habelar liután.

Timor-Leste iha meius atubele habelar di’ak liután, maibé presiza esforsu no servisu maka’as iha diresaun arte no kultura bele la’o ona ba eskola sira atu formadór sira bele espalla daudaun ona.

Anselmo Gusmão, hanesan formadór gitarra hatete formasaun artístika ne’e atu oferese oportunidade ba labarik sira ne’ebé iha interesse hodi dezenvolve no esplora liután talentu iha espesialidade dansa, múzika no arte plástika.

Formasaun ne’e loke iha espesialidade, maibé kondisaun no fasilidade ne’ebé limitadu mak formasaun ne’e realiza liuhusi prosesu audisaun hodi halo selesaun ba labarik sira ho idade 11 to’o 15.

Iha faze audisaun ne’e konsege selesiona formandu sira hamutuk 54, ho númeru formandu iha espesialidade arte plastika 14, espesialidade dansa 20 no espesialidade múzika 20.

Formasaun ne’e mós hahú ona iha loron 22 fulan-Maiu to’o loron 30 fulan-junu liubá ho durasaun fulan tolu no oras 64 kada espesialidade. Formandu sira ne’e hetan asisténsia husi formadór timoroan ne’ebé Governu haruka ba estuda iha Kuba no fila mai ona hodi fahe siénsia ne’e ba timoroan sira ne’ebé hetan oportunidade atu aprende husi sira.

Jornalista: Maria Auxiliadora

Editora: Rita Almeida

HUSIK IDA HATÁN