PLP La Konkorda ho Eleisaun Antisipada

0
1777
Enkontru entre Prezidente PLP, Taur Matan Ruak ho Xefe Estadu, Francisco Guterres Lú Olo hodi ko'alia kona-ba formasaun governu.

DILI, (TATOLI) – Vise Prezidente Partidu Libertasaun Populár (PLP), Fidelis Magalhães hateten PLP la konkorda ho eleisaun antisipada tanba Konstituisaun fó dalan klaru katak partidu mais votadu bele halo negosiasaun ho partidu sira seluk ne’ebé hetan asentu iha Parlamentu Nasionál hodi forma governu.

Vise Prezidente, Partidu Libertasaun Populár, Fidelis Magalhães.

“Situasaun hanesan agora, sé maka kondus prosesu ne’e Prezidente Repúblika, PLP apoiu tomak ba desizaun saida de’it maka Prezidente Repúblika foti iha tempu ida ne’e, tanba ne’e desizaun Estadu nian entaun partidu hotu-hotu tenke kumpri”, hatete ba jornalista sira iha Palásiu Prezidente Nicolau Lobato, Bairru Pité, kinta ne’e, hafoin akompaña Prezidente PLP, Taur Matan Ruak sorumutu ho Xefe Estadu, Francisco Guterres Lú Olo kona-ba formasaun governu.

Fidelis informa PLP la ko’alia kona-ba oinsá atu fahe pasta iha governasaun, maibé importante liu maka oinsá ajuda prosesu formasaun governu tuir dalan Konstituisaun.

Antes ne’e, Prezidente Repúblika husu atu respeita povu nia vontade no hotu-hotu tenke serbisu hamutuk, nune’e bele rezulta governu ida estável no dura to’o tinan lima. Tanba ne’e, Fidelis afirma PLP lakohi halo buat ne’ebé la tuir Konstituisaun.

Jornalista: Xisto Freitas

Editora: Rita Almeida

HUSIK IDA HATÁN