Peter Doyle Hasoru Prezidente Lú Olo

0
134
Embaixadór Austrália ba Timor-Leste, Pete Doyle ko´alia ba jornalista sira hafoin sorumutu ho Prezidenti Repúblika, Dr. Francisco Guterres Lú Olo iha Palásiu Prezidensiál. Imajen Ajénsia TATOLI/Xisto Freitas

DILI, (TATOLI) – Embaixadór Austrália ba Timor-Leste, Peter Doyle sorumutu ho Prezidente Repúblika, Francisco Guterres Lú Olo hodi ko’alia kona-ba konsiliasaun asuntu Tasi Timor.

“Onra boot mai ha’u bele enkontru ho Prezidente Repúblika hodi ko’alia kona-ba oinsá atu hametin relasaun entre governu foun Timor-Leste ho Austrália, liu-liu prosesu konsiliasaun kona-ba asuntu Tasi Timor, kooperasaun defeza no dezenvolvimentu”, dehan Doyle ba jornalista sira iha Palásiu Prezidente Nicolau Lobato, Bairu- Pité, sesta ne’e.

Peter Doyle haktuir, oras ne’e parte rua nafatin involve iha prosesu konsiliasaun. Prosesu ne’e, ko’alia negosiasaun maka fronteira marítima no dezenvolvimentu Tasi Timor.

Nia hatutan Nasaun rua konfia rezolusaun pásivu no kompromisu forte atu solusiona problema ne’e.

Antes ne’e, Ministru Planeamentu no Investimentu Estratéjiku Timor-Leste, Xanana Gusmão lidera Komisaun Konsiliasaun asuntu Tasi Timor hateten iha setembru tinan kotuk, Komisaun Konsiliasaun sei to’o konkluzaun ida katak sei iha akordu ida entre nasaun rua (TL no Austrália) ka sei halo relatóriu ida hosi komisaun ho rekomendasaun sira ba sekretáriu Jerál ONU nian (António Guterres).

“Ami tenke uza mekanizmu ne’ebé hanoin hosi Konvensaun ONU nian kona-ba Direitu Tasi nian ne’ebé loke dalan hodi harii komisaun konsiliatóriu ida entre Timor-Leste ho Austrália”, tenik Xanana foin lalais.

Komisaun ne’e iha membru na’in lima, na’in rua hili hosi Timor-Leste, na’in rua hosi Austrália, nomós prezidente na’in ida (embaixador Peter Taksøe-Jensen).

Jornalista: Xisto Freitas

Editora: Rita Almeida

HUSIK IDA HATÁN