Peace Coffee Menus Rendimentu Tan Trajédia “Anti” Prado

0
105
Peace Cofee. Foto: OLYMPUS DIGITAL CAMERA

DILI (TATOLI)–Akontesimentu espontánea ne’ebé akontese horisehik, Segunda (21/08) relasiona ho PNTL (Polisia Nasionál Timor-Leste) tiru gás lakromojéniu nomós insidente balun ne’ebé rezultadu estragu ba viatura estadu balun afeta mós ba atividade ekonómika maske ho frekuénsia ne’ebé konsidera ki’ik.

Kafeteira, Peace Coffee ne’ebé lokaliza besik mós estrada públiku, besik mós repartisaun públika, edifísiu UNTL (Universidade Nacional Timor Lorosa’e) nia atividade ekonomia hodi fasilita kafé timor ba timoroan sira namoos estranjeiru ne’ebé hadomi kafé típiku Timor-Leste nian sai paradu.

Kafeteira ne’ebé sai mós fatin estratéjiku ida hodi timoroan sira halibur malu hodi fahe sira-nia ksolok, konta istória no hamnasa kuaze loron tomak sai fuik no menus rendimentu kompara ho situasaun antes ne’e.

Empregada Peace Coffee, Juliana da Graça Maia haktuir ba Ajénsia Tatoli katak kliente no ema sira ne’ebé sempre ba desfruta sabór kafé timoroan nian menus liu kompara ho molok akontesimentu espontánea ne’ebé afeta mós ba fatin ne’e.

“Akontesimentu liu tiha, ami loke fali maibé ema ladún mai,” Juliana da Graça Maia konta tuir kliente sira ne’ebé iha loron baileet ema sempre ba no vizita beibeik hodi hemu kafé iha fatin ne’e.

Nia mós konta tuir katak iha akontesimentu horisehik sira taka sedu de’it tan sente ta’uk no trauma. Basa sira rasik haree ho matan katak iha tuda ida ba karreta governu nian ida husi ema deskoñesidu no konsege kona mós fatin ne’e nia odamatan maski la iha estragu ruma.

“Fatuk kona odamatan, ami buka salva ami-nia aan no ami taka tiha odamatan,” haktuir Empregada Peace Coffee, Juliana da Graça.

Insidente tuda husi ema deskoñesidu ne’e akontese maizumenus tuku 9.00 liu oras Timor-leste nian depois mak sira loke fali maibé kliente sira ida ka rua de’it mak ba hemu kafé.

“Rendimentu ohin nian la hanesan baibain tan ema la mai no ami taka sedu tan ta’uk ho situasaun ne’e,” informa empregada Peace Coffee, Juliana da Graça hanesan feto úniku husi mane na’in rua ne’ebé sai mós empregadu ba kafeteira Peace Coffee ne’e.

Entretantu tuir observasaun Tatoli iha fatin ne’e nota katak kafeteira Peace Coffee ema la rame hanesan baibain maibé kadeira no meza ne’ebé “Amante Kafé” sira halibur malu kuaze mamuk iha de’it ema ida ka rua.

(Jornalista: Rafy Belo)

(Editór : Manuel Pinto)

HUSIK IDA HATÁN