Peace Boat Cruise Sei Vizita Timor-Leste

0
172
Peace Boat ne'ebé sei vizita Timor-Leste.

JAPAUN, (TATOLI) – Iha tinan ida ne’e ró Peace Boat ne’ebé tula turista hamutuk 1000 sai husi Japan hodi hala’o nia paseiu bá rai sira iha rejiaun Ázia nian mak hanesan, Timor-Leste, Bali, Java, Kuala Lumpur, Sigapura, Xina no seluk no sei haleu nasaun hamutuk 21.

Tuir Programa ró ne’e sei  to’o iha Timor-Leste iha loron 19 marsu 2018.

Iha loron 10 to’o 11 agostu 2017, embaixada Timor-Leste, Nippon Lorosa’e hamutuk ho estudante timoroan sira iha Japaun no nasaun seluk partisipa eventu promove kultura no pás iha ró Peace Boat ba pasajeiru no vizitante sira.

Okaziaun ida iha Yokohama Port, Japaun,  timoroan sira introdús Timor-Leste ba turista sira atubele koñese di’ak liután nasaun Timor-Leste antes sira mai.

Peace Boat hanesan Organizasaun Internasionál Naun Governamentál (ONG) iha Japaun, mak ró ida ne’ebé iha inisitiva husi  estudante Japonés sira atu promove dame ba ema hotu hahú iha 1983, ho objetivu mak liuhusi vizita ho ró bá nasaun sira atu promove sustentabilidade pás ne’ebé hala’o durante ne’e iha fatin barak hanesan iha Japaun rasik, nasaun sira iha rejiaun Europa no Ázia hodi promove  atividade barak liiliu iha issue sira ne’ebé relevante ho pás.

Baibain ró ne’e uza bá hanesan mensajeiru atu hato’o pás, sensibiliza iha portu ne’ebé para ba oferese programa iha edukasaun no formasaun, fasilita no fahe koñesimentu.

Tuir Komisaun Organizadora husi ONG Peace Boat, Meri Joyce informa, planu Premiadu Nobel Dame nian husi Timor-Leste, Ramos Horta sei hola parte iha viajen ne’e hahú husi Japaun to’o iha Timór. “Maibe ami seidauk hetan konfirmasaun”.

Meri hatutan, vizita ró ba nasaun sira ne’e atu kria ambiente amigavel entre ema sira no koñese nasaun seluk nia kultura, fiar, moris loroloron, nune’e bele hatene hadomi, respeita malu hanesan umanu no promove pás.

Husi vizitate na’in-1000 ne’e maioria husi Japaun nomós nasaun seluk. Ró ne’e sei para iha nasaun ida maizumenus durante loron ida ka to’o tolu, konforme kondisaun nasaun no klima.

Programa ne’ebé mak sei hala’o durante para iha nasaun refere hanesan koñese hahán típika nasaun nian, vizita ONG lokál, eskola, fatin istóriku, komunidade no asiste múzika lokál depende husi programa Governu lokál.

Aleinde ne’e mos Peace Boat sei simu vizitante sira hanesan autoridade lokál no estudante ne’ebé atu vizita. Iha vizita ró ne’e, pasajeiru  sira selu rasik sira-nia estadia tanba ONG laiha fundu sufisiente.

Antes ne’e Peace Boat halo ona vizita ba Timór iha 2002 durante iha Nasaun Unida nia ukun, durante semana rua no halo atividade hanesan.

Mari haktuir iha Timór tanba ró ne’e boot liu, difikuldade atu para iha tasi ninin, nune’e hanoin atu para dook, mak uza ró ki’ik ba sidade Dili.

Eventu ne’ebé partisipa husi estudante timoroan sira hodi fahe informasaun kona-ba rai Timor-Leste, Janio Tilman  hatete haksolok mundu komesa koñese Timor-Leste maski foin ukun-aan tinan 15.

“Liu husi vizita ne’e bele loke tan dalan ba mundu liuliu turista internasionál sira hodi haree hetan nasaun Timor-Leste nia industria turizmu sei la’o di’ak liután, banhira ró sira vizita beibeik bá Timór”.

Janio hatutan husu juventude hotu-hotu  mak hatudu ita-nia ospitalidade ne’ebe di’ak ba pasajeiru iha ró ne’e no aprezenta Timor-Leste nia kultura no identidade.

Kontribuidora: Dulce Martins

HUSIK IDA HATÁN