PD Kumpri Órden Konstituisaun Ba Formasaun Governu

1
1337
Lider Partidu Demokratiku sira hasai retratu ho Xefe Estadu hafoin enkontru. Foto Tatoli/Egas Cristovao

DILI (TATOLI)–Prezidenti Partidu Demokrátiku (PD), Mariano Assanami Sabino hateten PD kumpri de’it órden Konstituisaun kona-ba formasaun governu.

Konstituisaun artigu 106 hateten partidu polítiku mais votadu maka forma Governu hafoin rona Prezidenti Repúblika nia hanoin no sujestaun.

“Konstituisaun artigu 106 haruka katak hafoin Tribunál Rekursu proklama rezultadu eleisaun parlamentár, hosi ne’ebá maka Prezidenti Repúblika sei bolu partidu sira ne’ebé maka hetan asentu iha Parlamentu Nasionál hodi rona sira nia hanoin antes forma governu,” Assanami hato’o informasaun ne’e ba jornalista sira hafoin nia ho nia estrutura sorumutu ho Prezidenti Repúblika, Dr. Francisco Guterres Lú Olo kona-ba formasaun Governu.

Nia dehan PD sempre iha konsisténsia ba Konstituisaun haruka ho prinsípiu rua importante maka tenki iha Governu ida ne’ebé maka estável no dura to’o tinan lima.

“Konstituisaun husu katak partidu sira ne’ebé maka povu fó fiar ona, tenki hamutuk jere demokrasia hodi serbi povu ho efisiénsia no efikás,” Assanami esplika.

Nia realsa katak PD sei la konkorda atu iha eleisaun antisipada, maibé hamutuk jere rezultadu eleisaun parlamentár ne’ebé povu depózita ona.

Nia haktuir PD simu ona karta hosi partidu FRETILIN kona-ba formasaun governu maibé PD iha mekanizmu internál liuhusi konferénsia para desidi pozisaun partidu nian.

“Nu’udar partidu ne’ebé kiik, sei hein hela modelu Governu saida maka partidu boot sira hakarak. Só rona tiha lai modelu Governu foun maka ami konvoka inkontru (konferénsia)  hodi foti desizaun,” eis Ministru Agrikultura no Peskas tenik.

(Jornalista: Xisto Freitas)

Editór : Manuel Pinto

1 COMMENT

  1. Ita hanoin katak PD nudar Partidu Jerasional ne’ebe mak sei fo vantajem stabilisator iha Nasaun laran. tamba sa? tamba durante Kampanye ne’ebe mak rona katak promesa sira katak PD prontu atu bele lori ukun bainhira povu fo fiar. nune’e lolos nudar deit faktor determinante maibe nudar mos FAKTOR DETERMINANTE ho situasaun aktual.
    tamba se partidu Segundo e terseiro Lugar horas ne’e firmi ona ba opozisaun mak presisa Quarto no Quinto Lugar hodi bele sai hanesan bareirras atu ultrapasa 33 kadeiras tuir Konstituisaun haruka.
    e Parabens ba ita hotu……Hein katak PD ho KHUNTO fo resposta diak ba iha prosesu sira ne’e tomak
    ABC

HUSIK IDA HATÁN