ONU Apresia Juventude TL Nu’udar Forsa Pás

0
48

DILI, (TATOLI) – Organizasaun Nasoen Unida iha Timor-Leste apresia juventude Timor-Leste (TL) nu’udar forsa hodi promove pás no estabilidade iha rai laran.

“Ami apresia tebes juventude Timor-Leste nu’udar forsa atu promove pás no estabilidade hodi sai ajente krítiku ba mudansa no alkansa rezultadu dezenvolvimentu sustentavél iha futuru”, hateten Koordenadór ONU iha TL, Knut Otsby iha semináriu ba loron internasionál juventude iha Delta Nova, Komoro, ohin.

Nia afirma, harii dame hanesan mensajen forte tebes hodi suporta objetivu nasionál ba jornada dezenvolvimentu.

“Timor-Leste halo ona progresu boot durante tinan 15 ona, dadaun ne’e tenke hola papél importante harii pás no estabilidade nasionál hanesan modelu ba mundu”, katak nia.

Haktuir tan, konferénsia internasionál halo iha fulan kotuk, TL lansa ona roteiru ba implementasaun objetivu dezenvolviemtu sustentavél signifika refleta kolaborasaun no sentimentu makas ba objetivu dezenvolvimentu sustentavél.

Enkuantu, roteiru ne’e integra mós objetivu lokál no nasionál liuhosi planu estratéjiku dezenvolvimentu nasionál TL nian.

Biar nune’e, TL nafatin enkoraza nasaun frazíl sira iha mundu liuhosi konferénsia internasionál, nune’e nasaun konflitu sira bele banati tuir ezemplu dame hodi sai hosi konflitu atu alkansa ba páz no dezenvolvimentu.

Nune’e mós, importante roteiru estratéjiku hatudu katak atu sai hosi frajilidade, konflitu no iha dalan ba páz liuhosi dezenvolvimentu sustentavél presiza renova komitmentu hodi iha progresu ba ema hotu no la tau ema ida ba kotuk.

Kompromisu mak halakon kiak, hamlaha no promove area saúde nian, investe iha edukasaun liuhosi hasa’e kapasiadade, hamoris no hasa’e kresimentu ekonómiku ne’ebé forte no kria kampu servisu hodi bele iha sustentabilidade.

Roteiru estratéjiku ida ho objetivu dezenvolvimentu sustentavél kona-ba igualdade jéneru ba páz no justisa nudar objetivu universál.

Akresenta, tinan ne’e TL defende pás no justisa hodi haforsa harii dame hodi halo asaun ba komunidade nia leet tanba eleisaun jerál sai sasin ho susesu iha estabilidade laran.

Nia haktuir, eis Prezidente, Jose Ramós Horta hateten juventude bele sai lider iha futuru maibé tenke estuda maka’as no investe iha setór edukasaun.

Jornalista: Zezito Silva

Editora: Rita Almeida

HUSIK IDA HATÁN