Ohin CNRT Realiza Konfrensia Nasionál

0
1887
Prezidente partidu bainhira atu hahu loke kongresu.

DILI (TATOLI)—Partidu Kongresu Nasionál Rekonstrusaun Timor Leste (P-CNRT) ne’ebé lideradu hosi “Maun Boot” Kay Rala Xanana Gusmão ho motto “Liberta a Pátria, Libertamos o Povu,” ohin, Sesta (04/08) oras 14H00 otl sei realiza konfrensia Nasionál iha Sentru Konvensaun Sentre Dili to’o Domingu (06/08) ho objektivu hodi diside formasaun governu depois rejultadu eleisaun Parlamentar

Tuir ajenda ne’ebé mak Ajânsia Noticiosa TATOLI asesu haktuir katak, konfrensia Nasionál ne’ebé realiza hosi CNRT atu halo konsilidasaun ba Partidu CNRT em-relasaun ho rezultadu eleisaun Parlamentar foin lalais ne’e.

Iha abertura Prezidente Partidu Kay Rala Xanana Gusmão sei halo diskursu ho karater fó liña orientasaun ba kuadrus polítiku CNRT ne’ebé partisipa konfrensia inklui militante, simpatizante no povu doben Timor kona-bá dezafiu no susesu ne’ebé mak CNRT hetan hosi eleisaun lejislativa.

Delegadu kongresu.

konfrensia Nasionál mós lideransa partidu CNRT nasionál sira sei relata kona-bá sira nia kontribuisaun servisu inklui rezultadu sai mak atinji iha eleisaun.

Hafoin ne’e, iha konfrensia Nasionál ne’e sei diside ou hakotu pontu sira hanesan tuir mai ne’e; Pozisaun CNRT ba rezultadu ne’ebé mak hahoris ona hosi eleisaun, pozisaun CNRT ba formasaun governu entre koligasaun ou opozisaun, diside polítika atu reforsa servisu partidu CNRT bele mós sei exklui estruktura partidu ne’ebé konsidera la iha kapasidade hodi halo servisu no ikus liu fó mensajem agradesementu ba povu doben Timor ne’ebé deposita ona konfiasan ba CNRT iha eleisaun lejislativu.

konfrensia Nasionál partispante mai hosi estruktura Partidu CNRT munisipiu, nasional no konsellu politika nasional-CPN ho estruktura konsellu Diretiva nasional-CDN ho nia membru sira.

Komparasaun Votantes CNRT nian 2012 ho 2017

Munisipiu Aileu iha 2012 votante hamutuk 10,785 no 2017, 10, 239, signifika municipiu Aileu iha tinan 2017 menus votante 546 hosi rezultadu 2012 nian.

Ainaro, 2012, votante iha 9.239 iha tinan 2017 sa’e ba 9.285, signifika aumenta 47 votante iha 2017.

Baukau, 2012, votante 12.458, iha 2017 tun ba 6.208, signifika CNRT lakon votus iha tinan ida ne’e hamutuk 6250.

Bobonaro, 2012, votante hamutuk 15.285 entertantu 2017, sa’e ba 15.288 signifika aumenta ema nain 3 iha tinan ida ne’e.

Covalima, 2012 iha votante 8.644 no 2017 sa’e ba 9.172, signifika aumenta 528 votu iha tinan ida ne’e.

Dili, 2012 iha votante 45.456 maibé iha 2017 votante sa’e ba 45.701, signifika aumenta votu 245.

Ermera, 2012 iha votu 19.354 no 2017, sa’e 19.577, sa’e 532 votu.

Lautem, tinan 2012, votu iha 5.799, agora 2017 sa’e ba 7.673, signifika aumenta 2.074.

Likisa, tinan 2012, votu iha 11.996, iha 2017 tun ba 10.987, signifika lakon 1009 votu.

Manatuto, 2012 CNRT hetan votu 9.242 no 2017 tun ba 7.761 lakon 1481 votus.

Manufahi, 2012 iha votu 7.006 ba 2017 sa’e ba 7.637 signifika aumenta 631 votu.

Oekusse, iha 2012 CNRT hetan votu 12.087, maibé 2017 tun ba 10.490 signifika lakon votu 1.597.

Vikeke, iha 2012 CNRT hetan votu 5.567 no 2017 sa’e ba 6.609, signifika aumenta 1.042 votu.

Aústralia iha 2017 hetan 86, Corea do Súl 52, Portugal 48 no Reino Unido 32.

Entertantu totál votus ne’ebé CNRT hetan iha tinan 2012 hamutuk 172.908 votu no iha tinan 2017 tun ba 167,345 votus ho nune’e iha eleisaun lejislativa tinan ida ne’e CNRT lakon votu hamutuk 5.563 votu.

(Cml@tatoli.tl)

 

 

HUSIK IDA HATÁN