MUTL Hato’o Petisaun ba Órgaun Soberanu

0
248
Movimentu Universitáriu Timor-Leste (MUTL) hato’o petisaun ba Parlamentu Nasionál (PN). Foto Tatoli: António Gonçalves

DILI, (TATOLI) – Movimentu Universitáriu Timor-Leste (MUTL), ohin, hato’o petisaun ba órgaun soberanu hanesan Parlamentu Nasionál (PN), Prezidente Repúblika (PR) no Tribunál Rekursu (TR) hodi haree konstitusionalidade no hasai rezolusaun ba polítika leilaun kareta Prado ba deputadu lejislatura da-toluk.

MUTL konsidera leilaun Prado ne’e la tuir prosedimentu sira ne’ebé prevé iha dekretu lei 32/2011 kona-ba Jestaun no Alineasaun ba Patrimóniu Movel sira Estadu nian.

Portavoz MUTL, Miguel Arcanjo Moniz da Silva afirma iha Kampus Sentrál, UNTL (Universidade Nasionál Timor Lorosa’e) katak rejeita totalmente desizaun ne’e, tan konsidera membru PN sira tau aas liu interese pesoál duke komun.

Tanba ne’e, portavoz MUTL ne’e liuhusi petisaun ezije ba PN atu kansela rezolusaun konaba leilaun kareta prado, atu membru PN foun bele utiliza nafatin kareta sira ne’e tanba konsidera katak kareta hirak ne’e kuaze kondisaun di’ak.

Husu património estadu labele ba fó ba individu atu privatiza karik kareta deputadu sei iha kondisaun di’ak atu utiliza.

Husu atu labele hola kareta foun ba deputadu foun tanba sei implika ba orsamentu jerál estadu no oportunidade ba moris di’ak povu.

Husu ba prezidente PN, Aderito Hugo da Costa ho nia membru tomak atu esplika pra-prosesu hodi rezulta rezolusaun ne’e ba públiku.

Nune’e mós husu diretór nasionál aprovizionamentu atu pendente prosesu tenderizasaun ba kareta foun, hodi hein rezolusaun di’ak no neutru ba preokupasaun povu nian.

Autoridade relevante hanesan Komisaun Anti Korupsaun (CAC-sigla portugés), Provedória Direitu Úmanu no Justisa (PDHJ-sigla portugés), no Tribunál Kontas atu loke investigasaun kle’an ba aktu deputadu sira-nia desizaun tanba konsidera nakonu ho konflitu interese no manipulasaun.

MUTL, liuhusi nia portavóz Miguel Arcanjo Moniz da Silva fó mós alternativa nu’udar kontribuisaun, kestaun ne’e ho alternativa katak kareta membru PN nian ne’e entrega fali ba deputadu foun sira atu uza ba halo servisu nu’udar deputadu iha mandatu foun.

Tanba, bankada boot sira deputadu tuan sira sei kontinua hela iha uma fukun PN katak la presiza hola tan kareta foun barak ba deputadu foun sira.

Husu atu membru PN ba dahaat nian hodi kria kritéria ba leilaun patrimóniu estadu ho sériu no rigorozu liutan nomós bainhira nafatin ho rezolusaun ne’e, husu membru PN sira atu prosesa leilaun ba públiku ho montante US$15.000,00.

Portavóz MUTL liuhusi petisaun halo reafirmasaun katak MUTL hateten ba membru PN sira atu foti medida iha loron tolu nia laran.

Bainhira liu loron ne’ebé mak determina ona maka MUTL no movimentu sira hotu sei mobiliza forsa populár hodi hasoru tanba MUTL konsiente katak rezolusaun refere la’ós alternativa di’ak no ikus hodi halo poupansa ba orsamentu jerál estadu.

Entretantu, manisfestaun MUTL, ajénsia Tatoli observa katak iha reprezentante klibur no asosiasaun estudante oioin hato’o mós sira-nia lamentasaun.

Nune’e mós manifestante sira, feto no mane kaer no hiit espanduk hodi haklalak katak: “A luta continua, unidos venceremos”.

Iha espanduk MTT (Movimentu Tane Timor) hakerek: “Fukit tradisaun koloniál iha Parlamentu” no “Harahun korente neo-koloniál iha Parlamentu”.

Seluk, husi KEP (Klibur Estudante Progresivu) hakerek: “Anti injustisa sosiál, anti tusan ajénsia internasionál, anti réjime kapitalista krónika, anti kolonialista foun, anti esplorasaun no eksploitasaun” inklui seluk tan.

Hafoin entrega petisaun ba PN, MUTL ho reprezentante klibur no asosiasaun estudante sira kontinua diriji petisaun ne’e ba PR no TR no asegura husi PNTL (Polísia Nasionál Timor Leste).

Jornalista: Rafy Belo

Editora: Rita Almeida

HUSIK IDA HATÁN