MKIA Sei Hapara Atividade Kompañia Balak Sal

0
131
Ezemplu produsaun masin. Foto google

DILI, (TATOLI) – Ministériu Komérsiu, Indústria no Ambiente (MKIA) liuhusi Diresaun Jerál Indústria no Kooperativa sei hapara atividade kompañia Balak Sal husi Manatutu ne’ebé hetan ona apoiu orsamentu milU$106 husi transferénsia públika.

Razaun hapara tanba to’o agora seidauk iha progresu ne’ebé di’ak ba produsaun masin, nune’e sei buka meiu hodi entrega fali ba grupu seluk atu jere.

Diretór Jerál Indústria no Koperativa, António da Costa.

Diretór Jerál Indústria no Kooperativa, António da Costa informa depois MKIA apoiu orsamentu hodi halo fatin masin nian, hadi’a armazein maibé programa kompañia nian lahatudu rezultadu ne’ebé di’ak.

“Ami kontinua halo aproximasaun nafatin, ko’alia oinsá mak programa ne’e bele la’o no sira konkorda hotu, filafali lala’o nafatin tanba ne’e mak iha tinan ida ne’e ami labele kontinua tan ho sira no sei buka meiu hodi ko’alia ho autoridade Manatutu hodi foti desizaun hodi hapara ida ne’e hodi fó posibilidade ba ema seluk para kaer, nune’e bele prodús masin”, António hatete iha Bebora-Dili, ohin.

Tanba kompañia masin ne’e lahalo atividade ho di’ak, nune’e ministériu iha 2017 sei lafó ona tempu ba empreza ne’e atu kontinua atividade no ekipa MKIA sei tuun hodi ko’alia ho administradór munisípiu hodi salva fali kapitál ne’ebé iha atu prodús fali masin no entrega fali ba empeza ne’ebé iha kapasidade atubele kaer fali atividade ba produsaun masin nian.

“Ne’e hanesan problema ba iha kompañia Balak Sal ne’ebé la sériu ba prosesu produsaun masin. Kapitál sira ne’e mak iha uma, mákina, fatin ka rai ne’ebé halo konstrusaun, kustu ne’ebé sira hasai ona ba prepara masin fatin ne’e mós osan hotu no sei konta ba valór ekonómiku ne’e sei iha”.

Diretór Jerál relata dezde inísia atividade kompañia ne’e foin kolleta masin kuaze tonelada 10 hanesan ne’e no lakontinua kolleta tan.

“Ne’ebé ita haree katak apoiu ne’e di’ak, ema husu ministériu apoiu tiha mas la ezekuta saida mak nia hakerek iha proposta, ida ne’e mak sai kestaun boot ne’ebé tenke buka diskute fali ho autoridade munisipál para bele foti desizaun tanba ne’e sai hanesan rekursu ida ne’ebé presiza dezenvolve ba munisípiu ne’e rasik”.

Após tama Governu Konstitusionál dahituk, MKIA sei trasa fali programa para ekipa ida ba halo diskusaun no halo levantamentu ba asset ne’ebé iha tanba kompañia gastu orsamentu hira para sira mós tenke iha responsabilidade ba osan ne’ebé gasta ona.

“Osan ne’e povu nian, sé ema ida de’it mak estraga tiha entaun ita buka meiu oinsá pelu menus ema seluk bele kaer para osan ne’e iha retornu fali”.

Hahú iha tinan 2010 iha tempu uluk sei Ministériu Turizmu, Komérsiu no Indústria (MTCI-sigla iha portugés) kompañia hatama prosposta no apoiu uma ho mákina nune’e iha tempu MKIA nia  mak entrega osan kompletu ho montante mil U$106 ba empreza Balak Sal ne’ebé to’o agora seidauk hatudu nia rezultadu.

Ministru Komérsiu, Indústria no Ambiente, Constâncio da Conceição Pinto hatete masin Manatutu iha problema dezde uluk kedan ne’ebé seidauk rezolve.

“Ida Manatutu tenke rezolve tanba ne’e mós apoiu husi ministériu, subvensaun públika nian uluk husi MTCI no defaktu seidauk realiza no ami tenta atu rezolve buat ne’e no sei rezolve. 

Jornalista: Maria Auxiliadora

Editora: Rita Almeida

HUSIK IDA HATÁN