MKIA Rekomenda Industria Ki’ik ba Governu Foun

0
55
Ministru Komérsiu, Indústria no Ambiente, Constâncio da Conceição Pinto simu sertifikadu apresiasaun husi Primeiru-Ministru, Rui Maria de Araújo ba servisu hamutuk durante tinan rua ho balun. Foto/GPM.

DILI, (TATOLI) – Ministru Komérsiu, Indústria no Ambiente, Constâncio da Conceição Pinto rekomenda ba Governu Konstitusionál dahituk ne’ebé mai liuliu iha Ministériu Komérsiu, Indústria no Ambiente (MKIA) katak lalika mehi halo buat ne’ebé mak boot liu maibé halo buat ne’ebé ki’ik maibé nia impaktu boot mak hanesan indústria ki’ik sira.

“To’o agora ita seidauk iha indústria kona-ba matéria jus, ita importa husi rai-liur de’it enkuantu ita iha ai-fuan barak iha ne’e, iha sabraka, goiavas bele prodús rasik iha ita-nia rai nune’e bele substitui ona”, Constâncio hato’o ne’e iha Lasibutak-Manleuana, horisehik.

Nomós tenke haree ba buat ne’ebé bele prodús iha rai-laran no konsentra iha ne’e para substitui ona importasaun husi rai-liur.

Constâncio Pinto relata durante nia mandatu iha MKIA nian hanesan servidór Estadu iha tinan rua ho balun husik hela buat ne’ebé bele halo tuir orsamentu ne’ebé iha mak masin, indústria resiklajen, kafé no sentru treinamentu ba prosesamentu ai-han iha Natarbora, mina nuu ne’ebé sirkula ona iha merkadu rai-laran, indústria tais ne’ebé halo ona promosaun barak iha rai-liur.

Aleinde ne’e apoiu grupu ki’ik sira halo produsaun ki’ik hanesan kripik, indústria sabaun iha Lautein no buat balun tan ne’ebé halo no hein katak Ministru foun ne’ebé mai bele kontinua fó nafatin apoiu ba grupu sira no promove grupu foun para rezolve daudaun problema ne’ebé mak populasaun hasoru loroloron.

“Ezemplu konkretu masin iha Atabae, komunidade ne’ebé halo masin sei rezolve sira-nia oan nia eskola, iha saúde bainhira moras no ida ne’e mak buat ki’ikoan ne’ebé husik hela ba sétimu Governu Konstitusionál”.

Enkuantu sobre ezekusaun orsamentu ministériu nian, tanba daudaun ne’e tama ona iha Governu Jestaun nian, ministériu sei halo esforsu para ezekuta no porsentu 70 gasta ona.

“Labele gasta hotu tanba Governu foun sei mai, gasta mós ho kuidadu no iha termu jestaun orsamentu ne’e, ezekusaun orsamentu iha MCIA la’o kapa’as tebes, tinan kotuk la’o to’o porsentu 90 e tal no tinan ne’e mós sei hanesan no ami mós konsege redús osan balun liuliu despeza ba iha feira sira, iha Lospalos, ezemplu ita halo feira ida ne’ebé boot tebes no susesu liu no gasta osan menus kompara ho feira ne’ebé ita halo iha Same, Oekusi no Aileu”.

Jornalista: Maria Auxiliadora

Editora: Rita Almeida

HUSIK IDA HATÁN