MKIA Rejistu ona Kooperativa 183

0
68
Foto/Google.

DILI, (TATOLI) – Diretór Nasionál Kooperativa Mikro no Pequena Empreza, Reinaldo Borges informa kooperativa ne’ebé rejista iha Ministériu Komérsiu, Indústria no Ambiente (MKIA), hamutuk 183 no hafahe ba ramu neen mak hanesan kréditu uniaun, multi sektorál, agrikultura, peska, pekuária no indústria.

Tuir dekretu lei númeru 16/2004 hatete lei fó dalan atu loke kooperativa iha ramu 13 maibé iha realidade seidauk bele konsege to’o ramu sira ne’e no daudaun iha ramu neen mak bele ona implementa.

Husi ramu neen ne’e iha kooperativa kréditu uniaun hamutuk 89 ho nia totál asset U$11,625,140.39, no nia membru hamutuk 24,246, kooperativa multi sektorál 52, asset iha U$284,586.79 no membru 1,492 no kooperativa agrikultura iha totál 18 ho nia asset U$2,399.75, membru hamutuk  276.

Kooperativa peska hamutuk 15 ho nia asset U$13,602.17, membru hamutuk 339, kooperativa pekuária hamutuk tolu ho nia asset U$982.00, membru 185 no kooperativa indústria hamutuk neen ho nia totál asset U$17,899.00 no membru 135.

“Totál kapitál husi 183 ne’e iha ona nia kapitál própriu ne’e U$11,944,610.10 ho totál membru 26,673 no mane 13,400 no feto 13,273. Ita haree balansu feto ho mane ladún dook malu”, Reinaldo hatete iha Bebora-Dili, ohin.

Husi totál 183 lasignifika katak kooperativa ne’e hotu-hotu la’o tanba husi parte MKIA halo tiha formasaun ba grupu sira bainhira fila mai laiha notísia ruma husi grupu balun no dalaruma to’o tinan ida hanesan ne’e kooperativa lala’o tiha ona.

“Husi ramu neen ne’ebé iha maioria kooperativa kréditu mak la’o di’ak, peska nia iha Ataúru no sira seluk ne’e mak atividade sei para hela, ne’ebé ba futuru oinsá atu hadi’a di’ak liután”.

Husi númeru kooperativa ne’e balun to’o tinan ida ka rua relatóriu lamai nune’e MKIA rekomeda atu grupu sira tenke halo karta tanba kooperativa ne’e harii voluntariamente ho inisiativa husi grupu rasik mak husu ba MKIA katak hakarak harii kooperativa, hafoin MKIA fahe iha etapa tolu mak halo sensibilizasaun, kursu báziku no halo formasaun espesialidade.

“Sé ema ne’e lapreparadu depois Governu tuun ba obriga depois halo formasaun ne’e mak barak dalaruma lala’o tanba sempre iha tendénsia polítika kuandu hahú harii kooperativa ne’e dalaruma tuun mai imi tenke bá ida ne’e. Hakarak ka lakohi ami tenke obedese ba superiór sira maibé depois ida ne’e kooperativa ne’e lala’o, tanba ne’e mak iha agora ne’e ami sempre haree sira husu mak ita bá, ita labele bá obriga”.

Jornalista: Maria Auxiliadora

Editora: Rita Almeida

HUSIK IDA HATÁN