Lorokraik Ne´e, TR Fó Sai Rezultadu Legalizasaun Apuramentu Nasionál

0
337
Imajen edifísiu TR.

DILI (TATOLI)—Prezidenti Tribunál Rekursu, Dr. Deolindo dos Santos hateten Tribunál Rekursu (TR) legaliza ona rezultadu apuramentu nasionál eleisaun parlamentár no sei anúnsua ba públiku iha tersa tuku 14:00 ne´e.

Prezidenti TR iha tersa dader ne´e sorumutu ho Prezidenti Repúblika, Dr. Francisco Guterres Lú Olo hodi ko´alia kona-ba apuramentu nasionál ne´ebé TR legaliza ona.

 “Kona-ba ida ne´e ami ko´alia duni maibé ha´u labele fó komentáriu antisipada tanba iha orsida tuku rua lorokraik maka TR sei hasai desizaun finál. Orsida tuku rua maka  jornalista sira hakat ba iha TR para bele akompaña prosesu kompletu,” nia informa kestaun ne´e ba jornalista sira iha Palásiu Prezidenti Nicolau Lobato, Bairu-Pité, Dili.

Kona-ba partidu CNRT halo rekursu ba rezultadu eleisaun parlamentár, Deolindo la fó komentáriu no husu jornalista atu akompaña de´it anunsiamentu rezultadu legalizasaun apuramentu nasionál iha edifísiu TR.

Rezultadu eleisaun parlamentár iha 22 Jullu liu-ba, partidu lima maka hetan asentu iha Parlamentu Nasionál maka hanesan; FRETILIN hetan kadeira 23 ho votus 168.480 (29,7%), CNRT kadeira 22 ho votus 167.345 (29,5%), PLP kadeira 8 ho votus 60.098 (10,6%), PD kadeira 7 ho votus 55.608 (9,8%) no KHUNTO kadeira 5 ho votus 36.547 (6,4%). (Jornalista: Xisto Freitas)

HUSIK IDA HATÁN