Líder F-FDTL Husu Povu Túr Hakmatek

0
508
Brigadeiru Jenerál F-FDTL, Filomeno Paixão ko´alia ba jornalista sira iha Palásiu Prezidenti Nicolau Lobato, ohin dader.

DILI (TATOLI)—Brigadeiru Jenerál FALINTIL-Forsa Defeza Timor-Leste (F-FDTL), Filomeno Paixão husu ba povu atu túr hakmatek hodi akompaña ámbitu negosiasaun ba formasaun governu ne´ebé oras ne´e hala´o hosi líder partidu polítiku sira.

Líder F-FDTL ne´e fiar katak maske líder nasionál sira ho sira nia polítika ne´ebé ket-ketak maibé iha objetivu ida de´it atu lori nasaun ne´e ba dalan ida di´ak liu.

“Apelu ba povu atu túr nonók no sei la akontese buat ida iha ámbitu formasaun governu,” nia dehan ba jornalista sira iha Palásiu Prezidenti Nicolau Lobato, Bairu-Pité, Dili, kuarta ne´e, hafoin sorumutu ho Xefi Estadu Lú-Olo.

Nia dehan postu F-FDTL kontinua destakadu iha terrenu, só deminui de´it fatin ida rua ne´ebé maka la hetan ameasa ona. “To´o agora laiha ameasa. Povu hakat liu esperiénsia barak ona, tanba ne´e ema hotu hakarak túr nonók,” Filomeno informa.

Objetivu inkontru ho Prezidenti Repúblika, nia tenik, ko´alia kona-ba loron FALINTIL 20 Agustu tinan ne´e no Prezidenti sujere atu loron FALINTIL ne´ebé sei hala´o iha Kuartel Jerál F-FDTL Fatuhada ne´e festeja ho didi´ak.

Aleinde halo aprezentasaun solene iha rai loron, parada militár no desfile, Brigadeiru Jenerál dehan, iha kalan hala´o aprezentasaun kona-ba loron moris FALINTIL, rezisténsia no múzika sira hodi anima komunidade sira ne´ebé asisti eventu ne´e.

(Jornalista: Xisto Freitas)

(Editór : Manuel Pinto)

HUSIK IDA HATÁN