Leovigildo Husu Funsionáriu Labele Koruptu

0
122
Sekretáriu Estadu Juventude no Desportu, Leovigildo da Costa Hornai fó tomada pose ba membru Komisaun Nasionál Desportu hamutuk na'in 8 no sai sasin maka Vigáriu Dioseze Dili, Pe. Juvito de Araújo. Imajen Ajénsia TATOLI/Xisto Freitas

DILI, (TATOLI) – Sekretáriu Estadu Juventude no Desportu, Leovigildo Hornai husu ba diretór no funsionáriu sira hosi Sekretaria Estadu Juventude no Desportu (SEJD) atu labele koruptu, nepotizmu, respeitu no trata ema hotu-hotu ho dignu.
Leovigildo hato’o kestaun ne’e liuhusi seremónia despedida ho funsionáriu SEJD no parseiru sira ne’ebé hala’o iha edifísiu Sekretaria Estadu Juventude no Desportu, Sionál, Lecidere, Dili, kinta (17/8) kalan.

Tuir nia, Timor presiza líder ida ne’ebé maka ezemplár no bainhira líder ida maka koruptu tiha, staf sira oinsá. Nia hatutan sé líder maka laiha integridade, laiha kapasidade absorve buat ne’ebé pozitivu ka buat loos, saida maka povu ne’e atu hetan.

“Buat hirak ne’e maka ha’u husik hela ba imi no ikus liu labele loko án, maibé tenki haraik án, simplisidade, respeitu mútua no espíritu serbi povu no nasaun”, sujere Hornai.

Nia mós hateten katak pelumenus nia kontribui ona instituisaun SEJD durante tinan rua (2015-2017) ho kapasidade natón ne’ebé iha no hatudu ona ezemplu balun katak nia tama ho faru mutin no sai mós ho faru mutin.

Governante ne’e haktuir, durante  ninia mandatu, serbisu lubuk ida ne’ebé sira konsege realiza maka estabelese Konsellu Nasionál Juventude, Polítika Nasionál Juventude, Komisaun Nasionál Desportu no hola parte kria Liga Futeból Amadora, Liga Amadora Basketból, Liga Voliból, harii no reabelita estádiu sira iha Maliana, Baucau, Manatuto, Dili no Ermera.

Iha biban ne’e, SEJD Leovigildo mós fó tomada pose ba membru Komisaun Nasionál Desportu, lansa Polítika Nasionál Juventude, asina Memorandu Entendementu entre SEJD, Ministériu Interiór, Ministériu Edukasaun, Ministériu Estatal ba implementasaun Lei Arte Marsiais, Arte Rituais, Lei Armas Brankas, Rama Ambon no entrega Sertifikadu Apresiasaun ba parseiru no ekipa SEJD.

Jornalista: Xisto Freitas

Editora: Rita Almeida

HUSIK IDA HATÁN